İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 200 Hüküm no: 172 Orijinal metin no: [50b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nikola v. Yani’nin Balıkhane ve Eski Yağkapanı’ndaki balık tuzlayıcı dükkânlarının yirmi sekiz buçuk hissesini Dimitraki v. Nikola’ya altı yüz guruşa sattığı Bakkāl Boyar tâifesinden Nikola v. Yani nâm zimmî meclis-i şer‘-i hatîr-i lâzımü’t-tevkīrde işbu bâ‘isü’s-sifr Dimitraki v. Nikola nâm zimmî muvâcehesinde ikrâr-ı tâm ve takrîr-i kelâm edip işbu akd-i âti’z-zikrin sudûruna değin yedimde ırsen ve şirâen mülk ve hakkım olup mahrûse-i Galata’da yüz yirmi sehim i‘tibâr olunan Balıkhâne kurbünde bir bâb ve Eski Yağkapanı kurbünde bir bâb Balık Tuzlayıcı demekle meşhûr bakkāl dükkânları derûnlarında mevcûde beyne’l-hiref gedik ta‘bîr olunur âlât-ı lâzıme-i ma‘lûmede olan yirmi sekiz buçuk sehim hisse-i şâyi‘amı, tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile müşteri-i mesfûr Dimitraki zimmîye altı yüz guruşa bey‘ ve temlîk ve teslîm eylediğimde, ol dahi ber-vech-i muharrer iştirâ ve temellük ve tesellüm ve kabz ü kabûl ettikden sonra semeni olan meblağ-ı mezkûr altı yüz guruşu mesfûr Dimitraki zimmî yedinden bi’t-tamam ve’l-kemâl ahz ü kabz edip bey‘-i mezkûrun tağrîr ve gabnine ve gedik husûsuna müte‘allika âmme-i de‘âvî ve kâffe-i mutâlebâtdan mesfûr Dimitraki zimmînin zimmetini ibrâ-ı âm ile ibrâ ve ıskāt eylediğimde, ol dahi ibrâ-i mezkûru kabûl edip fîmâ-ba‘d zikrolunan yirmi sekiz buçuk sehimde benim asla ve kat‘â alâka ve medhalim kalmayup müşteri-i mesfûr Dimitraki zimmînin mülk-i müşterâsı ve hakk-ı sırfı olmuşdur, keyfe mâ yeşâ’ ve hasbe-mâ-yahtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 4 min-Recebi’l-ferd sene [1]194. Şuhûdü’l-hâl: eş-Şâhidûne’s-sâbıkūn.