İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 200 Hüküm no: 173 Orijinal metin no: [50b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kazancı Panayot v. Kiryako’nun Sultan Bâyezid Câmii avlusundaki kazancı dükkânı gediğini bin yüz doksan senesinde oğlu Kiryako’ya bin iki yüz guruşa satmış olduğu Sultân Bâyezid’de kazgancı Fi’l-asl vilâyet-i Anadolu’da Gümüşhâne kazâsına tâbi‘ Kapu karyesi mütemekkinlerinden olup İstanbul’da Sultân Bâyezid-i velî ‒tâbe serâhu‒ hazretleri câmi‘-i şerîfi havlusunda Kazgancı Panayot v. Kiryako tarafından husûs-ı âti’z-zikri ikrâra vekîl olduğu el-Hâc Hüseyin Ağa b. el-Hâc Süleyman ve Hasan Ağa b. Eyüb nâm kimesneler şehâdetleriyle sâbit olan Todori v. Yorgi nâm zimmî meclis-i şer‘-i hatîr-i lâzımü’t-tevkīrde müvekkil-i mesfûrun sulbî kebîr oğlu işbu bâ‘isü’s-sifr Kiryako <> nâm zimmî muvâcehesinde ikrâr-ı tâm ve takrîr-i kelâm edip müvekkilim mesfûr Panayot câmi‘-i şerîf-i mezkûr havlusunda vâki‘ âhar dükkânı derûnunda mevcûde ber-mûceb-i defter-i müfredât gedik ta‘bîr olunur âlât-ı lâzıme-i ma‘lûme ile sâir evânî-i nühâsiyesini oğlu mesfûr Kiryako zimmîye doksan senesinde bin iki yüz guruşa bey‘ ve temlîk ve teslîm, ol dahi ber-vech-i muharrer iştirâ ve temellük ve tesellüm ve kabz ettikden sonra semeni olan meblağ-ı mezkûr bin iki yüz guruşu oğlum mesfûr Kiryako zimmîden bi’t-tamam ve’l-kemâl ahz ü kabz edip cihet-i mezkûreden oğlum mesfûr Kiryako [51a] zimmetinde bir akçe ve bir habbe asla ve kat‘â hakkım ve alacağım kalmayup husûs-ı mezkûra müte‘allika âmme-i de‘âvî ve kâffe-i mutâlebât ve eymân ve muhâsamâtdan oğlu mesfûr Kiryako zimmînin zimmetini ibrâ-ı âm ile ibrâ ve ıskāt, ol dahi ibrâ-i mezkûru kabûl eyledi dediğini mesfûr Kiryako tasdîk etmeğin mâ-vaka‘a bi’t-taleb ketb olundu. Fî 5 min-Receb sene 1194. Şuhûdü’l-hâl: el-Hâc Ali Ağa b. İbrahim, Yamak Mustafa b. Abdurrahman, el-Hâc Mustafa b. Abdurrahman, Alemdâr Ali b. Ömer, Ahmed Ağa b. el-Hâc Hüseyin, Abdullah b. Ömer, Kâtib Molla Feyzullah.