İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 201 Hüküm no: 174 Orijinal metin no: [51a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sultan Bâyezid Câmii avlusundaki kazancılardan Panayot v. Kiryako’nun vasiyeti Mesfûr Panayot vasiyeti Fi’l-asl vilâyet-i Anadolu’da Gümüşhâne kazâsına tâbi‘ Kapu karyesi mütemekkinlerinden olup İstanbul’da Sultân Bâyezid-i velî ‒tâbe serâhu‒ hazretleri câmi‘-i şerîfi havlusunda vâki‘ kazgancılardan Panayot v. Kiryako nâm zimmî tarafından husûs-ı âtiyyü’z-zikri ikrâra vekîl olduğu el-Hâc Hüseyin Ağa b. el-Hâc Süleyman Ağa ve Hasan Ağa b. Eyüb şehâdetleriyle sâbit olan Todori v. Yorgi nâm zimmî meclis-i şer‘-i hatîr-i lâzımü’t-tevkīrde müvekkil-i mesfûr Panayot zimmînin kebîr oğlu Kiryako hazır olduğu hâlde tâife-i mezbûreden işbu bâ‘isü’s-sifr Anton v. Hristo muvâcehesinde bi’l-vekâle ikrâr-ı tâm ve takrîr-i kelâm edip müvekkilim mesfûr Panayot zimmî, ben bi-emrillâhi te‘âlâ hâlik olduğumda oğlum Kiryako zimmî zimmetinde semen-i mebî‘den hakkım olan iki bin yüz altmış dört guruş on parayı ahz ve kabz edip meblağ-ı mezkûrdan esnâf-ı mezkûrenin nükūd-ı mevkūfesinden istidâne ve kabz edip hâlâ vakf-ı mezkûra deynim olan iki yüz guruşu mütevellî-i vakfa verile ve üç yüz guruşu karye-i mezbûrede vâki‘ çeşmeye harç ve sarf oluna ve iki yüz elli guruşu dâyinim olan Lazari zimmîye verile ve elli guruşu dâyinim olan Panayot zimmîye verile ve altı yüz guruşu oğlum mesfûr Kiryako zimmîye verile ve üç yüz guruşu vilâyetde mütemekkine kızım Saltana Nasrâniyeye verile ve üç yüz guruşu Sofya Nasrâniye[ye] verile ve bâkī yüz elli dört guruş on para zevcem Setef bt. Todori Nasrâniyeye verile deyü tâmmü’l-akl olduğu hâlde vasiyet ve tenfîzine işbu Anton zimmîyi vasî-i muhtâr nasb ve ta‘yîn eyledikde, ol dahi vesâyet-i mezkûreyi kabûl ve merâsimini edâya ta‘ahhüd eyledi dediğini mesfûr Anton zimmî dahi tasdîk etmeğin mâ-vaka‘a bi’t-taleb ketb olundu. Fî 5 min-Receb sene [1]194. Şuhûdü’l-hâl: Şâhidûne’s-sâbıkūn.