İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 202 Hüküm no: 175 Orijinal metin no: [51b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kazancı Panayot v. Kiryako’nun Sultan Bâyezid Câmii avlusundaki bakırcı dükkânı gediğini ve sâir eşyaları oğlu Kiryako’ya iki bin yüz altmış dört guruş on paraya sattığı Sultân Bâyezid’de bakırcı gediği Fi’l-asl vilâyet-i Anadolu’da Gümüşhâne kazâsına tâbi‘ Kapu karyesi mütemekkinlerinden olup İstanbul’da Sultân Bâyezid-i velî ‒tâbe serâhu‒ hazretleri câmi‘-i şerîfi havlusunda Kazgancı Panayot v. Kiryako tarafından husûs-ı âti’z-zikri ikrâra vekîl olduğu el-Hâc Hüseyin Ağa b. el-Hâc Süleyman ve Hasan Ağa b. Eyüb nâm kimesneler şehâdetleriyle sâbit olan Todori v. Yorgi nâm zimmî meclis-i şer‘-i hatîr-i lâzımü’t-tevkīrde müvekkil-i mesfûrun sulbî kebîr oğlu işbu bâ‘isü’s-sifr Kiryako nâm zimmî muvâcehesinde bi’l-vekâle ikrâr-ı tâm ve takrîr-i kelâm edip müvekkil-i mesfûrun zikrolunan câmi‘-i şerîf-i mezkûr havlusunda vâki‘ bir bâb bakırcı dükkânında mevcûde beyne’l-hiref gedik ta‘bîr olunur ber-mûceb-i defter-i müfredât âlât-ı lâzıme-i ma‘lûmesini ve bir mikdâr gedik i‘tibâr olunan atîk ve cedîd bakırlarını bin üç yüz ve sâir ma‘lûmü’l-vezn ve’l-kıyye sâz evânî-i nuhâsiyesini sekiz yüz altmış dört guruş on para ki min-haysü’l-mecmû‘ iki bin yüz altmış dört guruş on paraya, tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile oğlu mesfûr Kiryako zimmîye bey‘ ü temlîk ve teslîm eylediğimde, ol dahi ber-vech-i muharrer iştirâ ve temellük ve tesellüm ve kabz ettikden sonra semeni olan meblağ-ı mecmû‘-ı mezkûr iki bin yüz altmış dört guruş on parayı oğlu mesfûr Kiryako zimmînin babası müvekkil-i mesfûre zimmetinde vâcibü’l-edâ ve lâzımü’l-kazâ deyni olmak üzere oğlu mesfûrun üzerinde terk eyledi dedikde, mesfûr Kiryako zimmî dahi vekîl-i mesfûru cemî‘ kelimât-ı meşrûhasında ba‘de’t-tasdîk zikrolunan iki bin yüz altmış dört guruş on para babası müvekkil-i mesfûra cihet-i merkūmeden deyni olduğunu bi-tav‘i’s-sâf ikrâr ve i‘tirâf etmeğin mâ-vaka‘a bi’t-taleb ketb olundu. Fî 5 Receb sene [1]194. Şuhûdü’l-hâl: Şâhidûne’s-sâbıkūn.