İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 203 Hüküm no: 176 Orijinal metin no: [51b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Papa Yorgi v. Dimo’nun Edirnekapısı’ndaki iki bakkal dükkânının yüz yirmi sehim hisselerini Nikola v. Mihal’e yedi yüz elli guruşa sattığı Bakkāl Bakkāl tâifesinden Papa Yorgi v. Dimo nâm zimmî meclis-i şer‘-i hatîr-i lâzımü’t-tevkīrde tâife-i mezbûreden bâ‘isü’s-sifr Nikola v. Mihal nâm zimmî muvâcehesinde ikrâr-ı tâm ve takrîr-i kelâm edip işbu akd-i âti’z-zikrin sudûruna değin yedimde mülk ve hakkım olup mahmiye-i İstanbul’da Edirne Kapısı dâhilinde vâki‘ yüz yirmi sehim i‘tibâr olunup Araboğlu dükkânı demekle ma‘rûf bir bâb bakkāl dükkânında mevcûde beyne’l-hiref gedik ta‘bîr olunur âlât-ı lâzıme-i ma‘lûmeden mutasarrıf olduğum altmış sehim hisse-i şâyi‘am ile dükkân-ı mezkûr kurbünde vâki‘ Mehmed Beşe dükkânı demekle ma‘rûf bir bâb bakkāl dükkânında kezâlik mutasarrıf olduğum altmış sehim hisse-i şâyi‘amı, tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile mesfûr Nikola zimmîye yedi yüz elli guruşa bey‘ ve temlîk ve teslîm eylediğimde, ol dahi ber-vech-i [52a] muharrer iştirâ ve temellük ve tesellüm ve kabz ü kabûl ettikden sonra semeni olan meblağ-ı mezkûr dört yüz [yedi yüz] elli guruşu müşteri-i mesfûr Nikola zimmî yedinden bi’t-tamam ve’l-kemâl ahz ü kabz edip bey‘-i mezkûrun tağrîr ve gabnine ve gedik husûsuna müte‘allika âmme-i de‘âvî ve kâffe-i mutâlebâtdan mesfûr Nikola zimmînin zimmetini ibrâ-ı âm ile ibrâ ve ıskāt eylediğimde, ol dahi ibrâ-i mezkûru ba‘de’l-kabûl zikrolunan altmışar hisse-i şâyi‘ada benim asla ve kat‘â alâka ve medhalim kalmayup mesfûr Nikola zimmînin mülk-i müşterâsı ve hakk-ı sırfı olmuşdur, keyfe mâ yeşâ’ ve hasbe-mâ-yahtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 9 min-Receb sene [1]194. Şuhûdü’l-hâl: Pazarbaşı İbrahim, Bölükbaşı Molla Halil, Bölükbaşı Hasan, Kabz-ı mâl Yamandi, Yazıcı Dimitri, Panayot, Foti, Estane?, Tanaş.