İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 203 Hüküm no: 177 Orijinal metin no: [52a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsmail b. Ahmed’in Eyüp Cami-i kebîr Mahallesi’ndeki el-Hâc Mehmed Vakfı’na ait bahçenin nısfını karısı Zeliha bt. Mehmed Said’e devrettiği Medîne-i Hazret-i Ebâ Eyyûb-i Ensârî ‒radıye anhü Rabbühü’l-Bârî‒ mahallâtından Câmi‘-i Kebîr Mahallesi’nde vâki‘ bir tarafdan İbrahim Paşa zevcesi dile Hatun mülkü ve bir tarafdan Ahmed Ağa menzili ve bir tarafdan Hüseyin Odabaşı mülkü ve bir tarafdan tarîk-i âm ile mahdûd olup arsası merhûm el-Hâc Mehmed nâm sahibü’l-hayrın bir recül-i sâlih isneyn gecesi bir cüz’-i şerîf tilâvet etmek üzere vakf-ı müsecceli olduğu zâhir ve nümâyân olup şükûfe bağçesi olan menzil arsasının bâ-hüccet-i şer‘iyye tevcîh-i hâkimü’ş-şer‘le mutasarrıf[ı] olan İsmail b. Ahmed nâm kimesne meclis-i şer‘-i hatîr-i lâzımü’t-tevkīrde zikrolunan bağçenin nısfını hâlâ zevce-i menkûhası olan bâ‘isetü’l-kitâb Zeliha bt. Mehmed Said nâm hatuna hüsn-i rızâ ve tayyib-i ihtiyârî ve ferâğ-ı mû‘teber-i kat‘î ile işbu meclis-i şer‘de ferâğ ve kasr-ı yed etmekle, mezbûre Zeliha Hatun ber-vech-i muharrer tefevvüz ve kabûl ve ber-minvâl-i muharrer isneyn gecesi birer cüz’-i şerîf tilâvet etmek üzere ta‘ahhüd ettikde, hâkim-i muvakki‘-i sadr-ı kitâb bi-tevkī‘ihi’r-refî‘ü’l-müstetâb ‒rafe‘a kadrehû mevlâhü’l-Vehhâb‒ efendi hazretleri dahi nısf-ı bağçe-i mahdûde-i mezkûreyi zevci fâriğ-i mezbûrun kasr-ı yedinden mezbûre Zeliha Hatun mutasarrıfe olmak üzere ber-mûceb-i şart-ı vâkıf kıbel-i şer‘den tevcîh edip zabt ve tasarrufu’çün işbu vesîka-i enîka ketb ü imlâ ve yedine i‘tâ olundu. Fî 4 min-Receb sene 1194. Şuhûdü’l-hâl: Mehmed Emin Efendi, es-Seyyid Mehmed Sâdık Efendi, Molla Mustafa b. İsmail, Molla Veliyüddin.