İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 204 Hüküm no: 178 Orijinal metin no: [52a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice bt. Süleyman’ın bazı eşyaları ile Üskübî Mahallesi’ndeki menzilin nısfını kocası Osman Çelebi b. Mustafa’ya bin iki yüz otuz guruşa sattığı ve bazı eşyaları hibe ettiği Mahmiye-i İstanbul’da Küçük Mustafa Paşa kurbünde Üskübî Mahallesi sâkinelerinden mu‘arrefetü’z-zat Hadîce bt. Süleyman nâm hatun meclis-i şer‘-i hatîr-i lâzımü’t-tevkīrde, hâlâ zevci işbu bâ‘isü’l-kitâb Osman Çelebi b. Mustafa nâm kimesne mahzarında ikrâr-ı tâm ve takrîr-i kelâm edip işbu akd-i âti’z-zikrin sudûruna değin yedimde mülk ve hakkım olan bir altın zümrüd küpe ve bir çift altın bilezik [ve bir çift altın] kuşağımı zevcim mezbûr Osman Çelebi’ye hîbe-i sahîha-i şer‘iyye ile hîbe ve temlîk ve teslîm eylediğimde, ol dahi ber-vech-i muharrer meclis-i hîbede ittihâb ve kabûl ve eşyâ-i memlûkemden dahi on iki minder ve yirmi dört yasdık [52b] ve yedi yorgan ve iki memlû döşek ve elli vakıyye evânî-i nühâsiye ve iki çuka cübbe ve bir cübbe nâfe kürk ve altı çuka mak‘ad ve bir kırmızı biniş ve üç Şam alacası anteri ve bir sincab kürk ve bir kakum kürk ve bir cübbemi tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ve safka-i vâhide ile zevcim mezbûr Osman Çelebi’ye dört yüz otuz guruşa ve mahalle-i mezbûrede vâki‘ bir tarafdan Başyazıcı Ahmed Efendi menzili ve bir tarafdan merhûm Emin Ağa veresesi menzili ve bir tarafdan Hacı Emin menzili ve bir tarafdan tarîk-i âm ile mahdûd bir bâb mülk menzilimin dahi nısf-ı şâyi‘ini kezâlik sekiz yüz guruşa bey‘ ve temlîk ve teslîm eylediğimde, ol dahi ber-vech-i muharrer iştirâ ve temellük ve tesellüm ve kabz ve kabûl ettikden sonra semenleri olan meblağ-ı mecmû‘-ı mezkûr bin iki yüz otuz guruşun mutâlebesinden zevcim mezbûr Osman Çelebi’nin zimmetini ibrâ-i âmm-ı <> kātı‘ü’n-nizâ‘ ve ıskāt-ı tâmm-ı râfi‘ü’l-hısâm ile ibrâ ve ıskāt eylediğimde, ol dahi ibrâ-i mezkûru ba‘de’l-kabûl fîmâ-ba‘d eşyâ-i muharrere-i mezkûre ile nısf-ı menzil-i mezkûrda benim asla ve kat‘â alâka ve medhalim kalmayup zikrolunan küpe ve bilezik ve kuşak zevcim mezbûr Osman Çelebi’nin emlâk-i mevhûbesi ve eşyâ-i sâire-i mezkûre emlâk-i müşterâsı olmuşdur, keyfe mâ yeşâ’ ve hasbe-mâ-yahtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 21 Cumâdelâhire sene [1]194. Şuhûdü’l-hâl: el-Hâc Ahmed Ağa, es-Seyyid el-Hâc Ahmed, Bedirzâde Molla Ali, es-Seyyid Mehmed Said, Yiğitbaşı es-Seyyid Mehmed.