İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 205 Hüküm no: 179 Orijinal metin no: [52b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Osman Çelebi b. Mustafa’nın bazı eşyaları ile Üskübî Mahallesi’ndeki menzilin nısfını karısı Hatice bt. Süleyman’a bin iki yüz otuz guruşa sattığı ve bazı eşyaları hibe ettiği Mahmiye-i İstanbul’da Küçük Mustafa [Paşa] kurbünde Üskübî Mahallesi sükkânından Osman Çelebi b. Mustafa nâm kimesne meclis-i şer‘-i hatîr-i lâzımü’t-tevkīrde hâlâ zevce-i menkûhası bâ‘isetü hâze’l-kitâb Hadîce bt. Süleyman nâm <> hatun muvâcehesinde ikrâr-ı tâm ve takrîr-i kelâm edip işbu akd-i âtiyyü’z-zikrin sudûruna değin yedimde mülk ve hakkım olan bir altın zümrüd küpe ve bir çift altın bilezik ve bir çift altın kuşağımı zevcem mezbûre Hadîce Hatun’a hîbe-i sahîha-i şer‘iyye ile hîbe ve temlîk ve teslîm eylediğimde, ol dahi ber-vech-i muharrer meclis-i hîbede ittihâb ve kabûl ve eşyâ-i memlûkemden dahi on iki minder ve yirmi dört yasdık ve yedi yorgan ve iki memlû döşek ve elli vakıyye evânî-i nühâsiye ve iki çuka mak‘ad [cübbe] ve bir cübbe nâfe kürk ve altı çuka mak‘ad ve bir kırmızı biniş ve üç Şam alacası anteri ve bir sincab kürk ve bir kakım kürk ve [bir] cübbemi tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ve safka-i vâhide ile zevcem mezbûre Hadîce Hatun’a dört yüz otuz guruşa ve mahalle-i mezbûrede vâki‘ bir tarafdan Başyazıcı Ahmed Efendi menzili ve bir tarafdan merhûm Emin Ağa veresesi menzili ve bir tarafdan Hacı Emin menzili ve bir tarafdan tarîk-i âm ile mahdûd bir bâb mülk menzilimin nısf-ı şâyi‘ini kezâlik sekiz yüz guruşa bey‘ ve temlîk ve teslîm eylediğimde, ol dahi ber-vech-i muharrer iştirâ ve temellük ve tesellüm ve kabz ve kabûl ettikden sonra semenleri olan meblağ-ı mecmû‘-ı mezkûr cem‘an bin iki yüz otuz guruşun mutâlebesinden zevcem mezbûre Hadîce Hatun’un zimmetini ibrâ-i âmm-ı kātı‘ü’n-nizâ‘ ve ıskāt-ı tâmm-ı râfi‘ü’l-hısâm ile ibrâ ve ıskāt eylediğimde, ol dahi ibrâ-i mezkûru ba‘de’l-kabûl fîmâ-ba‘d eşyâ-i muharrere-i mezkûre ile nısf-ı menzil-i mezkûrda benim asla ve kat‘â alâka ve medhalim kalmayup zikrolunan küpe ve bilezik ve kuşak zevcem mezbûre Hadîce Hatun’un emlâk-i mevhûbesi ve eşyâ-i sâire-i mezkûre emlâk-i müşterâsı olmuşdur, keyfe mâ teşâ’ ve hasbe mâ tahtâr mutasarrıfe olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu.. Fî 17 Cumâdelâhire sene [1]194. Şuhûdü’l-hâl: eş-Şâhidûne’s-sâbıkūn.