İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 206 Hüküm no: 180 Orijinal metin no: [53a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Uncular Kethudası Mustafa Ağa b. Ahmed’in Unkapanı’ndaki değirmen gediğini Pargam v. Serkiz’e bin dört yüz guruşa sattığı [Defterin 53a’sından itibaren varaklandırma problemi bulunmakta olup defterde 53a’ya tekabül eden kısım ileride yerine kaydedilmiştir.] Uncular Kethudâsı Mustafa Ağa b. Ahmed nâm kimesne meclis-i şer‘-i hatîr-i lâzımü’t-tevkīrde Pargam v. Serkiz nâm zimmî muvâcehesinde ikrâr-ı tâm ve takrîr-i kelâm edip İstanbul’da Kapan-ı dakīk dâhilinde vâki‘ Şa‘riyyeci Değirmeni demekle ma‘rûf sekiz sehim i‘tibâriyle mutasarrıf olduğum iki horoslu bir bâb uncu değirmeni derûnunda mevcûde beyne’l-esnâf gedik ta‘bîr olunur sekiz re’s bargir ve sâir âlât-ı lâzıme-i ma‘lûmemi tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile mesfûr Pargam zimmîye bin dört yüz guruşa bey‘ ve temlîk ve teslîm eylediğimde, ol dahi ber-vech-i muharrer iştirâ ve temellük ve tesellüm ve kabz ü kabûl ettikden sonra semeni olan meblağ-ı mezkûr bin dört yüz guruşu mesfûr Pargam zimmî yedinden bi’t-tamam ahz ü kabz eyledim. [Ba‘de’l-yevm] bey‘-i mezkûrun tağrîr ve gabnine ve gedik husûsuna müte‘allika âmme-i de‘âvî ve mutâlebât ve kâffe-i eymân ve muhâsemâtdan mesfûr Pargam zimmînin zimmetini ibrâ-i âm ile ibrâ ve ıskāt eylediğimde, ol dahi ibrâ-i mezkûru ba‘de’l-kabûl fîmâ-ba‘d zikrolunan sekiz re’s bargir ve sâir âlât-ı lâzıme-i ma‘lûmede benim asla ve kat‘â alâka ve medhalim kalmayup müşteri-i mesfûr Pargam zimmînin mülk-i müşterâsı ve hakk-ı sırfı olmuşdur, keyfe mâ yeşâ’ ve yahtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 13 Recebi’l-ferd [1]194. Şuhûdü’l-hâl: eş-Şâhidûne’s-sâbıkūn.