İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 206 Hüküm no: 181 Orijinal metin no: [53a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerîfe Hatice bt. Halil’in boşandığı kocası Hafız Molla Hüseyin b. Ali’den mehir ve nafaka alacaklarını tahsil ettiği ve ibralaştıkları Mahmiye-i İstanbul’da Gül Câmi‘-i şerîfi Mahallesi sâkinelerinden Şerîfe Hadîce bt. Halil nâm hatun tarafından husûs-ı âti’z-zikrde vekîl olduğu zâtını ârifân olan Mustafa b. Mehmed ve es-Seyyid Hasan b. Ahmed nâm kimesneler şehâdetleriyle sâbit olan el-Hâc Süleyman b. Halil nâm kimesne meclis-i şer‘-i hatîr-i lâzımü’t-tevkīrde müvekkile-i mezbûre Şerîf Hadice’nin zevci işbu bâ‘isü’l-kitâb Hâfız Molla Hüseyin b. Ali nâm kimesne mahzarında ikrâr-ı tâm ve takrîr-i kelâm edip mezbûr Hâfız Molla Hüseyin müvekkilem mezbûre Şerîfe Hadice’nin zevc-i dâhili olup işbu târih-i kitâb günü müvekkilem mezbûreyi bâyinen tatlîk etmekle, zimmetinde mütekarrir ve ma‘kūdün-aleyh olan yüz elli guruş mehr-i müeccel ile cânib-i şer‘den bi’t-terâzî takdîr olunan on guruş nafaka-i iddetini işbu meclis-i şer‘de bana def‘ ü teslîm, ben-dahi bi’l-vekâle yedinden ahz ü kabz edip husûs-ı zevciyete ve ibtidâ’-i zevciyetden işbu târih-i kitâba gelince beynlerinde cereyân eden bi’l-cümle hukūk-ı ma‘lûme ve mechûleye müte‘allika âmme-i de‘âvî ve mutâlebât ve kâffe-i eymân ve muhâsemâtdan ben bi’l-vekâle mezbûr Molla Hüseyin’in zimmetini ibrâ-i âmm-ı kātı‘ü’n-nizâ‘ ve ıskāt-ı tâmm-ı râfi‘ü’l-hısâm ile ibrâ ve ıskāt, ol dahi müvekkilem mezbûre Şerîfe Hadîce Hatun ile babası mezbûr Halil’in ve anası işbu hâzıra bi’l-meclis Şerîfe Fâtıma’nın zimmetlerini ibrâ-i âmm-ı kātı‘ü’n-nizâ‘la ibrâ ve ıskāt ve her birimiz âharın ber-vech-i muharrer ibrâsını kabûl eyledik dediğini mezbûr Hâfız Molla Hüseyin ve mezbûr Halil ve Şerîfe Fâtıma’dan her biri tasdîk etmeğin mâ-vaka‘a bi’t-taleb ketb olundu. Fî 15 Recebi’l-ferd sene [1]194. Şuhûdü’l-hâl: es-Seyyid el-Hâc Mustafa b. el-Hâc İbrahim, el-Hâc Hüseyin b. Mehmed, el-Hâc İsmail b. Süleyman, Süleyman Beşe b. Mehmed, Üsküdar[î] el-Hâc Mehmed b. Hasan.