İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 211 Hüküm no: 186 Orijinal metin no: [54b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kayıp olan Tohari v. Yanaki’nin Balkapanı’ndaki odası ve bakkal dükkânı içindeki mal, eşya, defter ve senedlerinin korunması için alacaklılarının talebiyle Aci Kostantin v. Dimitri’nin vasî ve kayyım tayin edildiği Mahmiye-i İstanbul’da Bal Kapanı ahâlîsinden ve bakkāl tâifesinden gaybet-i münkatı‘a ile gāib olup hayat ve memâtı ma‘lûm olmayan Tohari v. Yanaki zimmînin hâli mütebeyyin oluncaya değin kapan-ı mezkûrda ve oda ve dükkânında olan emvâl ve eşyâ ve defter ve senedâtının hıfzı’çün dâyinlerinden olup esâmîleri mazbût olan ehl-i İslâm ve zimmîlerden on beş nefer kimesneler kıbel-i şer‘den mu‘temedün-aleyh bir kimesnenin vasî ve kayyım nasb olunmasını iltimâs eylediklerinde, hâkim-i muvakki‘-i sadr-ı kitâb bi-tevkī‘ihi’r-refî‘ü’l-müstetâb ‒rafe‘a kadrehû mevlâhü’l-Vehhâb‒ efendi hazretleri sadâkat ile ma‘rûfe ve istikāmet ile mevsûfe ve her vechile emîn ve mu‘temed olduğu zeyl-i vesîkada muharrrerü’l-esâmî Müslimîn ihbârlarıyla mütehakkık olan kapan-ı mezkûr ahâlîsinden bâ‘isü’s-sifr Aci Kostantin v. Dimitri nâm zimmîyi gāib-i mezbûrun hâli mütebeyyin oluncaya değin mâlını hıfz içün vasî ve kayyım nasb ü ta‘yîn buyurduklarında, ol dahi ber-vech-i muharrer vesâyet ve kayyımlığı kabûl ve kemâ-hüve hakkuhû hizmetini edâya ta‘ahhüd etmeğin mâ-vaka‘a bi’t-taleb ketb olundu. Fî 19 Recebi’l-ferd sene [1]194. Şuhûdü’l-hâl: Otuzlu-zâde el-Hâc Mehmed Ağa, Kethudâ-yı Muhzırân Mehmed Ağa, İsmail Çelebi.