İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 212 Hüküm no: 187 Orijinal metin no: [54b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Bey Mahallesi’ndeki çörekçi fırınında talaş bulundurmayacağını, yedi veya sekizden fazla kalfa ve çırak çalıştırmayacağını taahhüt eden Çörekçi Abdullah b. Osman’dan mahalle ahalisinin râzı oldukları Husûs-ı âti’l-beyânın mahâllinde ketb ü tahrîri’çün savb-ı şer‘-i enverden bi’l-iltimâs irsâl olunan Kâtib Ahmed Efendi mahmiye-i İstanbul’da Kıztaşı kurbünde Mustafa Bey Mahallesi Câmi‘-i şerîfi’ne varup huzûr-ı Müslimînde akd-i meclis-i şer‘-i âlî ettikde, mahalle-i mezbûre İmâmı Mustafa Efendi b. İbrahim ve Müezzin Molla Ömer b. Mehmed ve ahâlîsinden el-Hâc Mustafa Ağa b. Hasan ve Süleyman Ağa b. Abdullah ve Mehmed Efendi b. Ali ve Ali Odabaşı b. Mustafa ve diğer Mehmed Efendi b. Ebîbekir ve Ali Efendi b. Süleyman ve Mehmed Odabaşı b. Hüseyin ve İbrahim Ağa b. İbrahim ve Mehmed b. Mehmed ve Ahmed Ağa b. Salih ve Mustafa Odabaşı b. Ali ve Mehmed Memiş Ağa b. Ahmed ve es-Seyyid Ali b. Mehmed ve Ali Ağa b. Hasan ve es-Seyyid Hasan Çelebi b. Ebîbekir ve Ahmed Ağa b. Yahya ve Hasan b. Abdullah ve Mehmed Ağa b. Abdullah ve Hasan Ağa b. Hüseyin ve Mehmed Ağa b. Abdünnebi ve Mehmed Ağa b. Ahmed ve Ömer Ağa b. Halil ve Mustafa b. Osman ve Mustafa Ağa b. <> Mustafa ve es-Seyyid el-Hâc Ahmed Ağa b. Ali ve Hasan Ağa b. İbrahim ve Hasan Ağa ve es-Seyyid Mustafa b. Ahmed ve diğer Ömer Ağa b. Ali ve Ali Ağa b. Ahmed ve es-Seyyid Mehmed Ağa b. Mehmed ve diğer Mehmed Ağa b. Abdullah ve Osman Ağa b. Mustafa ve Gözlemeci Salih b. Mehmed ve Hammâmî Hâfız Mehmed Efendi b. el-Hâc Mustafa ve Derzi Mehmed Ağa b. Abdullah [55a] ve es-Seyyid Mustafa b. Hasan ve Duhânî İbrahim Beşe nâm kimesneler meclis-i ma‘kūd-ı mezkûrda çörekçi tâifesinden işbu bâ‘isü’l-vesîka el-Hâc Abdullah b. Osman mahzarında her biri takrîr-i kelâm edip mezbûr el-Hâc Abdullah’ın taht-ı icâresinde olan mahalle-i mezbûrede vâki‘ bir bâb fırın mukaddemâ simidci fırını olup mezbûr Çörekçi el-Hâc Abdullah istîcâr ettikden sonra fırın-ı mezkûrda çörek ve börek tabh ve ibâdullâha bey‘ eder iken bundan akdem mahallemiz ahâlîsinden ba‘zı kimesneler mezbûr el-Hâc Abdullah fırın-ı mezkûra talaş vaz‘ eder deyü teşekkî ve ke’l-evvel simidci fırını olmasını istid‘â etmişler idi. El-hâletü-hâzihî mezbûr el-Hâc Abdullah fırın-ı mezkûra kat‘â talaş vaz‘ etmeyüp ve istihdâm edeceği kalfa ve şâgirdleri emîn ve mu‘temed ve müstakīm olmak üzere yedi ve sekiz neferden ziyâde kalfa ve şâgird istihdâm etmemek üzere ta‘ahhüd ettikde, bizler dahi mahallemiz ahâlîsine çörekçi fırınının lüzûmu olduğuna binâen cümlemiz mezbûr el-Hâc Abdullah’ın fırın-ı mezkûrda çörek ve börek tabh etmesine râzı olduk dediklerini kâtib-i mezbûr mahâllinde ketb ve tahrîr ve ma‘an mürsel ümenâ’-i şer‘le meclis-i şer‘a gelep alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fî 14 min-Recebi’l-ferd sene [1]194. Şuhûdü’l-hâl: Mehmed Ağa b. Ahmed, Ahmed Ağa b. Mehmed, Ali Ağa b. Ahmed.