İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 213 Hüküm no: 188 Orijinal metin no: [55a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tüccar Mehmed Sadık b. Mehmed ile eski ortağı Hafız Mehmed Sadık b. Mustafa’nın hesaplaşıp birbirlerinin zimmetini ibra ettikleri Yaş yemiş tüccârından Mehmed Sâdık b. Mehmed nâm kimesne meclis-i şer‘-i hatîr-i lâzımü’t-tevkīrde sâbıkā şerîki işbu bâ‘isü’l-kitâb Hâfız Mehmed Sâdık b. el-Hâc Mustafa nâm kimesne mahzarında ikrâr-ı tâm ve takrîr-i kelâm edip ben bundan akdem mezbûr Hâfız Mehmed Sâdık ile yaş yemiş ticâretinde inânen şerîk olup fesh-i akd-i şirket ettiğimizden sonra esnâf ma‘rifetiyle hesâbımızı hesâb-ı sahîh ile rü’yet eylediğimizde, mezbûr Hâfız Mehmed Sâdık zimmetinde re’s-i mâldan zuhûr eden yüz elli beş guruş ve fâideden iktizâ eden seksen guruş ki cem‘an iki yüz otuz beş guruşu mezbûr Hâfız Mehmed Sâdık bana def‘ ü teslîm, ben dahi yedinden bi’t-tamam ve’l-kemâl ahz ü kabz edip husûs-ı şirkete ve fâideye ve sâir beynimizde cereyân eden cemî‘ ahz ü i‘tâ ve mu‘amelât-ı şettâ ve hukūk-ı ma‘lûme ve mechûleye müte‘allika âmme-i de‘âvî ve mutâlebât ve kâffe-i eymân ve muhâsamâtdan ben mezbûr Hâfız Mehmed Sâdık’ın zimmetini ibrâ-i âmm-ı kātı‘ü’n-nizâ‘ ve ıskāt-ı tâmm-ı râfi‘ü’l-hısâm ile ibrâ ve ıskāt eylediğimde, ol dahi kezâlik husûs-ı şirkete ve fâideye ve sâir beynimizde cereyân eden ahz ü i‘tâ ve mu‘amelât-ı şettâ ve hukūk-ı ma‘lûme ve mechûleye müte‘allika âmme-i de‘âvî ve kâffe-i mutâlebâtdan ve beynimizde ma‘lûm otuz guruşun da‘vâsından benim zimmetimi ibrâ-i âm ile ibrâ ve ıskāt ve her birimiz âharın ber-minvâl-i muharrer ibrâsını kabûl eyledik dediğini mezbûr Hâfız Mehmed Sâdık tasdîk etmeğin mâ-vaka‘a bi’t-taleb ketb olundu. Fî 19 min-Recebi’l-ferd sene [1]194. Şuhûdü’l-hâl: el-Hâc Ahmed Ağa, Uncular Kethudâsı Mustafa Çelebi, Duhânî Ali, İsmail Çelebi, Kemahî İbrahim.