İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 213 Hüküm no: 189 Orijinal metin no: [55a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sakome bt. Ohanes’in Yedikule dışındaki ekmekçi fırını ve değirmenin on iki hissesini Kırana bt. Agop’a üç bin beş yüz guruşa satıp, iki yıllığına sekiz yüz guruşa kiraladığı Havâss-ı refî‘a kazâsına muzâfe Hasköy kasabasında Abdüsselam Mahallesi mütemekkinelerinden Sakome bt. Ohanes Nasrâniye tarafından husûs-ı âti’z-zikri ikrâra vekîl olduğu şahsını ârifân Mikail v. Avadis ve Sorepe v. Haçador nâm zimmîler şehâdetleriyle sâbit olan Mıgırdıç v. Kirkor nâm zimmî meclis-i şer‘-i hatîr-i lâzımü’t-tevkīrde Kumkapı Nişâncası Mahallesi mütemekkinelerinden Kırana bt. Agop nâm Nasrâniye tarafından husûs-ı âti’z-zikri tasdîka vekîl olduğu kezâlik şahsını ârifân olan Sorepe v. Haçodor ve Agisa v. Minas şehâdetleriyle mütehakkık olan Mardiros v. Agop nâm zimmî muvâcehesinde bi’l-vekâle ikrâr-ı tâm ve takrîr-i kelâm edip İstanbul hısnı ebvâbından Yedikule hâricinde vâki‘ bir bâb ekmekçi fırını ve ona merbût yirmi dört sehim [55b] i‘tibâr olunur altı horoslu bir bâb ekmekçi değirmeni derûnunda mevcûde beyne’l-esnâf gedik ta‘bîr olunur yirmi dört re’s bargir ve sâir âlât-ı lâzıme-i ma‘lûmeden müvekkilem mesfûre Sakome Nasrâniye mutasarrıfe olduğu on üç buçuk re’s bargirden bir buçuk re’sini ibkā bâkīsi olan on iki re’s bargiri ifrâz ve kemâl-i imtiyâz ile mümtâz ettikden sonra zikrolunan on iki re’s bargiri tarafeynden îcâb ve kabûlü hâvî alâ-tarîkı’l-istiğlâl müvekkile-i mesfûre Kırana Nasrâniyeye üç bin beş yüz guruşa bey‘ ve temlîk ve teslîm eylediğinde, ol dahi ber-vech-i muharrer iştirâ ve temellük ve tesellüm ve kabz ü kabûl edip ve meblağ-ı mezkûr üç bin beş yüz guruşu müvekkile-i mesfûre Kırana Nasrâniye yedinden bi’t-tamam ve’l-kemâl ahz ü kabz eylediğinden sonra müvekkile-i mesfûre Kırana Nasrâniye zikrolunan on iki sehim i‘tibâr olunan on iki re’s bargir ve sâir âlât-ı lâzıme-i ma‘lûmeyi gıbbe’t-tahliyeti’ş-şer‘iyye ve’t-takābuzi’l-mer‘î târih-i kitâbdan iki sene tamamına değin sekiz yüz kırk guruşa müvekkilem mesfûre Sakome Nasrâniyeye îcâr ve teslîm, ol dahi vech-i meşrûh üzere istîcâr ve kabûl eyledi dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 25 Receb sene [1]194. Şuhûdü’l-hâl: Şâhidûne’s-sâbıkūn-ı Müslimûn. Mikail v. İstefan, Vartan v. Tomas, Serkiz v. Aleksan.