İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 214 Hüküm no: 190 Orijinal metin no: [55b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Said Çelebi b. Mustafa’nın Ayasofya-i kebîr Camii yakınındaki çörekçi dükkânı gediğinin nısfını Çörekçiler Kethudaâsı Osman Çelebi b. Mahmud’a iki bin guruşa sattığı Ayasofya’da çörekçi es-Seyyid Mehmed Said Çelebi b. es-Seyyid el-Hâc Mustafa nâm kimesne tarafından husûs-ı âtiyyü’z-zikri ikrâra vekîl olduğu Kethudâ Mustafa Ağa b. Abdullah ve Yiğitbaşı es-Seyyid Mehmed Emin b. Ahmed şehâdetleriyle sâbit olan el-Hâc Ahmed Ağa b. Hüseyin nâm kimesne meclis-i şer‘-i hatîr-i lâzımü’t-tevkīrde çörekçiyân kethudâsı olup nısf âlâta mutasarrıf olan bâ‘isü’l-kitâb Osman Çelebi b. Mahmud mahzarında bi’l-vekâle ikrâr-ı tâm ve takrîr-i kelâm edip işbu akd-i âtiyyü’z-zikrin sudûruna değin müvekkilim mezbûr es-Seyyid Mehmed Said’in yedinde olup İstanbul’da Ayasofya-i kebîr Câmi‘-i şerîfi kurbünde vâki‘ Sakalar Çeşmesi üzerinde olan bir bâb çörekçi dükkânı derûnunda mevcûde beyne’l-hiref gedik ta‘bîr olunur üç yüz elli vakıyye bakır tâbe ve tebsi ve sâir âlât-ı lâzıme-i ma‘lûmenin nısf-ı şâyi‘ini tarafeynden îcâb ve kabûlü hâvî şûrût-ı müfside <> ve muvâza‘adan ârî bey‘-i bâtt-ı sahîh-i şer‘î ve safka-i vâhide ile mezbûr Osman Çelebi’ye iki bin guruşa bey‘ ü temlîk ve teslîm eylediğinde, ol dahi ber-vech-i muharrer iştirâ ve temellük ve tesellüm ve kabz ü kabûl ettikden sonra semeni olan meblağ-ı mezkûr iki bin guruşu mezbûr Osman Çelebi yedinden bi’t-tamam ve’l-kemâl ahz ü kabz edip bey‘-i mezkûrun tağrîr ve gabnine ve gedik husûsuna müte‘allika âmme-i de‘âvî ve ve kâffe-i mutâlebâtdan mezbûr Osman Çelebi’nin zimmetini ibrâ-i âm ile ibrâ ve ıskāt eylediğinde, ol dahi ibrâ-i mezkûru kabûl edip ba‘de’l-yevm zikrolunan âlât-ı lâzıme-i ma‘lûmede müvekkilim mezbûr es-Seyyid Mehmed Said’in asla ve kat‘â alâka ve medhali kalmayup müşteri-i mezbûr Osman Çelebi’nin mülk-i müşterâsı ve hakk-ı sırfı olmuşdur, keyfe mâ yeşâ’ ve hasbe-mâ-yahtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sânî ve’l-işrîn min-Recebi’l-ferd li-sene erba‘a ve tis‘în ve mie ve elf. Şuhûdü’l-hâl: Uncular Kethudâsı Mustafa, Sayıcı Molla Osman, es-Seyyid el-Hâc Ahmed, Hâfız Molla Mustafa, Çörekçi Molla Ahmed, es-Seyyid el-Hâc Mehmed, Yazıcı Molla Süleyman, Yiğitbaşı Halil.