İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 215 Hüküm no: 191 Orijinal metin no: [56a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Babasının vefatıyla Kadıasker Mehmed Efendi Camii imamet ve hitabet vazifesi tevcih edilen Ahmed’in sakalı çıkıp istihkakı görülünceye kadar Abdurrahim Efendi b. Abdullah’ın vekil tayin edildiği Mahmiye-i İstanbul’da Hüsrev Paşa kurbünde Kādıasker Mehmed Efendi Câmi‘-i şerîfi imâmı ve hatîbi olup bundan akdem fevt olan Mehmed Efendi’nin sulbî sagīr oğlu es-Seyyid Ahmed’in büyükbabası ve tesviye-i umûruna bâ-hüccet-i şer‘iyye vasî-i mansûbu olan el-Hâc Mehmed nâm kimesne meclis-i şer‘-i hatîr-i lâzımü’t-tevkīrde işbu bâ‘isü’l-kitâb Abdurrahîm Efendi b. Abdullah nâm kimesne mahzarında bi’l-vesâye ikrâr-ı tâm ve takrîr-i kelâm edip müteveffâ-yı merkūm Mehmed Efendi’nin mutasarrıf olduğu imâmet ve hitâbet cihetleri oğlu sagīr-i mezbûr es-Seyyid Ahmed’e taraf-ı Saltanat-ı aliyye’den tevcîh ve inâyet ve ihsân buyurulup, mültehî olup imâmete istihkākı zâhir olunca imâmet hizmetini edâ etmek içün vekîl nasb ve ta‘yîn olunmak muktezî olmağla, merkūm Abdurrahîm Efendi vekâlet-i mezkûreye ehil ve mahall ve müstehık ve muhtâr-ı cemâ‘at olmağla, merkūm Abdurrahîm Efendi’yi ben bi’l-vesâye vekîl ve nâib-i menâb nasb ü ta‘yîn ve hâkim-i muvakki‘-i sadr-ı kitâb bi-tevkī‘ihi’r-refî‘ü’l-müstetâb ‒veffakallâhu te‘âlâ ilâ sebîli’s-savâb‒ efendi hazretleri dahi hitâbet-i mezkûreyi edâ içün vekîl nasb ü ta‘yîn buyurduklarında, ol dahi vekâlet-i merkūmeleri kabûl ve hizmet-i lâzımelerini kemâ-yenbagī edâya ta‘ahhüd ve iltizâm eyledi dediğini merkūm Abdurrahîm Efendi tasdîk etmeğin mâ-hüve’l-vâki‘ bi’t-taleb ketb olundu. Fî-selh-i Recebi’l-ferd sene [1]194. Şuhûdü’l-hâl: es-Seyyid Halil b. Mustafa, Mütevellî İbrahim Ağa, Kâtib Hüseyin Efendi, Hâfız Feyzullah b. İsmail, es-Seyyid Hasan Efendi, Kasım Ağa b. Ahmed.