İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 217 Hüküm no: 193 Orijinal metin no: [56b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Debbağyunus Camii’nde tamir ve tecdid edilecek yerlerin keşif defteri ve cami vakfı mütevellisine izin verildiği Husûs-ı âti’l-beyânın mahâllinde tahrîri’çün bi’l-iltimâs kıbel-i şer‘den irsâl olunan müderrisînden es-Seyyid Ali Efendi ve hâssa mi‘mârlarından Ubeydullah Halîfe ile mahmiye-i İstanbul’da Debbağyunus Câmi‘-i şerîfi’ne varup zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i şerîf ettikde, câmi‘-i şerîf-i mezkûrun hâlâ mütevellîsi İmâm Abdullah Efendi nâm kimesne meclis-i ma‘kūd-ı mezkûrda takrîr-i kelâm edip câmi‘-i şerîf-i mezkûr harâb ve tecdîd ve ta‘mîre muhtâc olmağla keşf ve mu‘âyene olunup galle-i vakf-ı mezbûrdan tecdîd ve ta‘mîr olunmak üzere kıbel-i şer‘den yedime izin hücceti i‘tâ olunmak matlûbumdur dedikde mi‘mâr-ı mezkûr ve sâir vukūfu olan Müslimîn ile câmi‘-i şerîf-i mezkûrun tecdîd ve ta‘mîre muhtâc olan mahallerine nazar eylediklerinde, fi’l-hakīka câmi‘-i şerîfin üzerinde ve bâlâsında tûlen yirmi dört ve arzen ma‘a-hevâ on dört zirâ‘ on beş arşun kebîrî mikrâslı Rumeli omurga kuşaklı çifte mâne göğüslemeli tahta pûşîdeli kiremidli sakaf tecdîdi ve zikrolunan sakfın cevânib-i erba‘asında tûlen yetmiş iki kadden yarım ve arzen yarım zirâ‘ münhedim olan mahâlline müceddeden etek-i kirpi saçak tecdîdi ve inhidâma mâil olan mevcûd tavanı rabt içün yedi aded çapa tapanı [ve] mevcûd tavanda ve şişberlerinde ve ba‘zı mahallerinde tûlen on üç ve arzen on bir buçuk zirâ‘ meremmât ve harc-ı uskundura [ve] bu mahâlde zikrolunan sakafı ve tavanı rabt içün üç aded çifte mâneden açma başlıklı devr sütun [ve] zikrolunan sütunların tavan ittisâlinde tûlen on bir ve kadden yarım zirâ‘ müceddeden Bağdâdî tolos tecdîdi ve bu mahâlde beheri kadden iki ve arzen bir zirâ‘ dört parmak dîvârlarda altı aded rengâmîz câm süsleme ve meremmâtı ve zikrolunan câmlar tahtında beheri kadden iki ve arzen bir zirâ‘ dört parmak altı adet pençerelerde mevcûd gürgân çârçûbeler meremmâtı ve mahfel-i şerîf üzerinde ziyâya muhtâc olan mahâllinin beheri kadden iki ve arzen bir zirâ‘ dört parmak mâne çârçûbeli ağaç parmaklıklı iki aded pençere tecdîdi ve zikrolunan pençerelere beheri kadden iki ve arzen bir zirâ‘ dört parmak kalaylı rahtlı gürgân çârçûbeli vasat tahta çaplı iki aded kâr-ı cedîd [ve] câmi‘-i şerîfin derûnunda terbî‘an elli zirâ‘ iktizâ eden mahallere üç kat [57a] beyâz sıva tecdîdi [ve] câmi‘-i şerîf derûnunda tûlen on üç buçuk ve arzen on bir zirâ‘ <> kirişleri mevcûd tahta döşeme tecdîdi ve câmi‘-i şerîfin mevcûd tavanında tûlen on üç buçuk arzen on bir zirâ‘ elvan boya tecdîdi ve câmi‘-i şerîf derûnunda mevcûd terbî‘an iki yüz elli beş zirâ‘ pençereler pervazlarında ve sütunlarında minber-i şerîfde ve kürsî-i latîfde mevcûd tarabzonlarda elvan boya tecdîdi ve son cemâ‘at mahâllinde tûlen on altı arzen ma‘a-hevâ on zirâ‘ bâlâda zikrolunan misillü sakf tecdîdi ve bu mahâlde müceddeden inhidâma mâil olan tavanları rabt içün altı aded çapa tapanı [ve] bu mahâlde mevcûd tûlen on dört ve arzen dokuz zirâ‘ tavanlarda meremmât ve elvan boya tecdîdi ve harc-ı uskundura ve zikrolunan tavanların tapan rabtı’çün iki aded çifte mâne sütun ve zikrolunan sütunlar bâlâsına tûlen dokuz kadden yarım zirâ‘ Bağdâdî kemer tecdîdi ve bu mahâlde mevcûd pençerelerde ve bâblarda ve tarabzonlarda ve sâir iktizâ eden mahallere terbî‘an on beş zirâ‘ elvan boya tecdîdi ve bu mahâlde dîvârda tûlen on dört ve kadden dört zirâ‘ üç kat beyâz sıva tecdîdi ve bu mahâlde mevcûd pençerelerin zahrında noksanı olan mahallere müceddeden zahrı kaplı elvan boyalı beheri tûlen bir buçuk ve kadden iki zirâ‘ dört çifte doğrama kanad tecdîdi ve beheri tûlen bir buçuk kadden iki zirâ‘ yedi aded çârçûbeler meremmâtı ve bu mahâlde mevcûd pençerelerde elli beş aded vasat tahta çam terbî‘an iki yüz elli zirâ‘ câmi‘-i şerîf zahrında ve derûnunda badana tecdîdi ve minâre derûnunda münhedim olan kademe mahâlline saray mânesi çiftesinden iki kademe tecdîdi ve tûlen beş buçuk ve kadden bir buçuk ve arzen bir zirâ‘ câmi‘-i şerîfin mevcûd minâre-i şerîfesinin tahtında bârândan ve şiddet-i şitâdan münhedim olan mahâlline mismârdan çüplama eyici? ile rıhtım tecdîdi [ve] devren altı ve kadden on iki zirâ‘ zikrolunan minâre gövdesinde ve peteğinde horasanlı direz tecdîdi ve devren altı ve kadden on iki zirâ‘ gövde-i minârede üç kat badana tecdîdi ve beheri tûlen iki buçuk kadden üç zirâ‘ câmi‘-i şerîf-i mezkûrun dergâh ve havlu bâblarında meremmât ve tûlen altmış beş ve arzen bir buçuk zirâ‘ câmi‘-i şerîfin mevcûd havlu dîvârları üzerinde yalnız akdarma kiremid [ve] tûlen on bir kadden beş arzen bir zirâ‘ câmi‘-i şerîf mihrâbının sol tarafında münhedim olan havlu dîvârlarına taş mahlût kara sığır kuşaklı melez duvar tecdîdi ve tûlen on arzen ma‘a-hevâ yedi zirâ‘ tabutluk mahâllinde tek mâne mikrâslı kara sığır kuşaklı tahta pûşîdeli kiremid mahlût sakf tecdîdi ve cânib-i erba‘asında tûlen otuz iki kadden beş zirâ‘ arşun sütunlu kara sığır [57b] kuşaklı korniyeden tahta perde tecdîdi ve tûlen iki arzen bir buçuk zirâ‘ etrâfı tahta perdeli kiremid sakaflı kenîf meremmâtı ve sâir mahallerin tecdîd ve ta‘mîre muhtâc olunduğunu ba‘de’l-keşf ve’l-mu‘âyene haber verdiklerini mevlânâ-yı mezbûr mahâllinde ketb ü tahrîr ve meclis-i şer‘a gelüp alâ-vukū‘ihî inhâ etmeğin vech-i meşrûh üzere câmi‘-i şerîf-i mezkûrun tecdîd ve ta‘mîre muhtâc olan sâlifü’l-beyân mevâzi‘-i mezkûreleri galle-i vakf-ı mezbûrdan kadr-ı ma‘rûf meblağ ile tecdîd ve ta‘mîre kıbel-i şer‘den mütevellî-i mezbûra izin birle mâ vaka‘a bi’t-taleb ketb olundu. Fî 15 min-Receb sene 1194. Şuhûdü’l-hâl: es-Seyyid İbrahim Efendi, İsmail Efendi, Mekteb hocası Mehmed Efendi, eş-Şeyh Ahmed Efendi, Za‘îm Mustafa Ağa, Mehmed Emin Ağa b. Mehmed Emin Kethudâ-yı muhzırân, Mehmed Ağa b. Ahmed, Sarrâc Mehmed.