İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 219 Hüküm no: 194 Orijinal metin no: [57b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kayıp olan Tohari v. Yanaki’nin dükkân ve odalardaki bozulması muhtemel mallarını satmaya izin verilen vasî ve kayyım Aci Kostantin v. Dimitri’deki eşyaları defteri Sâdır olan fermân-ı âlîlerine imtisâlen kıbel-i şer‘den mürsel Kâtib Ahmed Efendi İstanbul’da Balkapanı tüccârından ve bakkāl tâifesinden olup gaybet-i münkatı‘a ile gāib olan Tohari v. Yanaki zimmînin İstanbul’da Ketâncilerbaşı’nda Haseki Mustafa Ağa hânında vâki‘ odasını küşâd ve oda-i mezkûre derûnunda ve Kapan’da ve Yeni Hân’da mevcûd olan bi’l-cümle eşyâsını mazbûtü’l-esâmî Müslimîn huzûrlarında tahrîr ve gāib-i mezbûrun hâli mütebeyyin oluncaya değin gerek eşyâ-i mevcûdeyi ve gerek berren ve bahren zuhûr edecek emvâl ve eşyâsını hıfza kıbel-i şer‘den bâ-hüccet-i şer‘iyye vasî ve kayyım nasb ü ta‘yîn olunan Kapan ahâlîsinden Aci Kostantin v. Dimitri nâm zimmîye teslîm olunup, lâkin eşyâ-i mezkûrenin ekseri yağ ve bal misillü telef ve zâyi‘ olacağı mütehakkık olduğundan eşyâ-i mezkûre vakit ve zamanıyla sa‘r ve râyici üzere bey‘ ve semenleri hıfz olunmak gāib hakkında enfa‘ [ve] eyser olmağla, telef ve zâyi‘ olacak eşyâyı sa‘r ve râyici üzere kapan nâibi efendi ma‘rifetiyle bey‘ ve semenlerini Kapan defterine idhâl etmek üzere merkūm Aci Kostantin zimmîye cânib-i şer‘den izin verilmekle, gāib-i mezbûrun mahâll-i mezkûre[de] olan eşyâsı defteridir ki ber-vech-i âtî zikrolunur. Fi’l-yevmi’l-hâdî ve’l-işrîn min-Recebi’l-ferd sene [11]94. Yün memlû minder aded 3 Yün memlû beledî yasdık aded 5 Kırmızı ihrâm mak‘ad aded 1 Basma çit mak‘ad aded 1 Yanbolu kebesi aded 3 Alaca kebe aded 1 Kastamonu astarı top aded 2 Kırmızı bez top aded 1 Kilim aded 2 Köhne mâ‘i beylik aded 1 Müsta‘mel sîm sâ‘at aded 2 Kehrübâr pafta aded 1 [58a] Ceviz pîştahta aded 1 Sîm tâs aded 1 Cedîd sîm gülâbdân ma‘a buhû[r]dân aded 1 Başları telli beyâz bez top aded 6 Billûr bardak aded 1 Akçe tahta[sı] aded 2 Alacehri boyası çuval aded 1 Balta aded 1 Ağaç sofra aded 1 Pirinç şam‘dân ma‘a mikrâs aded 1 Aba kapu perdesi aded 1 Mangal tahtası aded 1 <<İskele>> İskemle aded 1 Leğen ma‘a ibrik aded 1 Ağaç çötere aded 1 Boş çuval aded 1 Saplı tencere ma‘a kapak aded 1 Defter vaz‘ olunan demir sandık aded 1 Revgan-ı sâde desti aded 1 tahmînen kıyye 10 fî para 8 Ketâncilerbaşı’nda Yeni Hân’da mevcûd asel-i potna aded 51 kıyye ma‘a dara 4071 Kapan’da mevcûd revgan-ı don ve çereviş yedek aded 14 kıyye ma‘a dara 5952 Kapan’da mevcûd revgan-ı peynir yedek aded 9 kıyye 1112 Şuhûdü’l-hâl: Edirnelizâde el-Hâc Mehmed, Hâfız el-Hâc Hasan, Peynirci Hüseyin Ağa, es-Seyyid el-Hâc Süleyman Ağa, Çukadar Hüseyin Ağa.