İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 220 Hüküm no: 195 Orijinal metin no: [58a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Babasının vefatıyla Hoca Hayreddin Camii imamet vazifesi tevcih edilen Ahmed Efendi b. Mehmed’in sakalı çıkıp istihkakı görülünceye kadar Mehmed Efendi b. Hüseyin’in vekil tayin edildiği Mahmiye-i İstanbul’da Em[î]r Buhârî tekyesi kurbünde Hoca Hayreddîn Câmi‘-i şerîfi’nde imâm olan Ahmed Efendi b. Mehmed nâm kimesne meclis-i şer‘-i hatîr-i lâzımü’t-tevkīrde câmi‘-i mezkûrun müezzini olan bâ‘isü’l-kitâb Mehmed Efendi b. Hüseyin nâm kimesne mahzarında ikrâr-ı tâm ve takrîr-i kelâm edip imâmet-i mezkûre babam müteveffâ Mehmed Efendi’nin fevtinden bâ-berât-ı âlî-şân bana tevcîh ve inâyet buyurulup, lâkin ben mültehî olup imâmete istihkākım zâhir olunca edâ-i hizmet-i imâmet içün yerime âhâlî-i mahalle-i mezbûrenin muhtârı olan bir kimesneyi tevkîl etmek muktezî olmağla, câmi‘-i mezkûrun müezzini olan merkūm Mehmed Efendi vekâlet-i mezkûreye her vechile ehil ve mahall [ve] müstehık ve muhtâr-ı cemâ‘at olmağla merkūm Mehmed Efendi[‘yi] vekîl ve nâib-i menâb nasb ve ta‘yîn eylediğimde, ol dahi vekâlet-i merkūmeyi kabûl ve hizmet-i lâzımesini kemâ-yenbagī edâya ta‘ahhüd ve iltizâm etmeğin mâ-vaka‘a bi’t-taleb ketb olundu. Fî 2 min-Şa‘bân sene [1]194. Şuhûdü’l-hâl: es-Seyyid el-Hâc Mehmed Sâdık, es-Seyyid Osman, es-Seyyid Hasan b. Ahmed, Abdullah, Molla Abdullah, Ahmed Beşe, es-Seyyid Mustafa.