İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 221 Hüküm no: 196 Orijinal metin no: [58b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ekmekçi Abram v. Kasber’in Koca Mustafa Paşa’daki iki ekmek fırını ve iki değirmenin on beş hissesini Karabet v. Arutin’e bin beş yüz guruşa sattığı Habbâz tâifesinden Abram v. Kasber nâm zimmî tarafından husûs-ı âti’z-zikri ikrâra vekîl olduğu Habbâzân Kethudâsı Mustafa Ağa b. Abdullah ve el-Hâc Ahmed Ağa b. Hüseyin nâm kimesneler şehâdetleriyle sâbit olan Vartan v. Tomas nâm zimmî meclis-i şer‘-i hatîr-i lâzımü’t-tevkīrde habbâz tâifesinden işbu bâ‘isü’l-kitâb Karabet v. Arutin muvâcehesinde bi’l-vekâle ikrâr-ı tâm ve takrîr-i kelâm edip İstanbul’da Koca Mustafa Paşa’da vâki‘ Koca Mustafa Paşa fırını demekle ma‘rûf bir bâb ekmekçi fırını ve ona merbût yirmi dört sehim i‘tibâriyle altı horoslu bir bâb değirmen ve mahâll-i mezkûrede vâki‘ fırın-ı mezkûra mülhak bir bâb ekmekçi fırını ve ona merbût on altı sehim i‘tibâriyle dört horoslu bir bâb değirmen derûnlarında mevcûde beyne’l-hiref gedik ta‘bîr olunur kırk altı re’s bargir ve sâir âlât-ı lâzıme-i ma‘lûmeden on sehmi Turşucuzâde kerîmesi demekle arîfe Fâtıma Hatun’un ve on beş sehmi müşteri-i mesfûr Karabet zimmînin karındaşı Avanes zimmînin olup on beş sehmi dahi müvekkilim mesfûr Abram zimmînin akd-i âti’z-zikrin sudûruna değin yedinde mülkü olmağla, tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile mesfûr Karabet zimmîye bin beş yüz guruşa bey‘ ve temlîk ve teslîm eylediğinde, ol dahi ber-vech-i muharrer iştirâ ve temellük ve tesellüm ve kabz ü kabûl edip semeni olan meblağ-ı mezkûr bin beş yüz guruşu müşteri-i mesfûr Karabet zimmî yedinden bi’t-tamam ve’l-kemâl ahz ü kabz edip bey‘-i mezkûrun tağrîr ve gabnine ve gedik husûsuna müte‘allika âmme-i de‘âvî ve kâffe-i mutâlebât ve eymân ve muhâsamâtdan müşteri-i mesfûr Karabet zimmînin zimmetini ibrâ-i âm ile ibrâ ve ıskāt eylediğinde, ol dahi ibrâ-i mezkûru kabûl edip fîmâ-ba‘d zikrolunan on beş re’s bargir ve on beş re’s bargire isâbet eden sâir âlât-ı lâzımede müvekkilim mesfûrun asla ve kat‘â alâka ve medhali kalmayup müşteri-i mesfûr Karabet zimmînin mülk-i müşterâsı ve hakk-ı sırfı olmuşdur, keyfe mâ yeşâ’ ve yahtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî-gurre-i Şa‘bâni’l-mu‘azzam sene [1]194. Şuhûdü’l-hâl: Uncular Kethudâsı Mustafa, Yiğitbaşı es-Seyyid Mehmed Emin, Çörekçi Molla Ahmed, es-Seyyid Mehmed Said, es-Seyyid el-Hâc Ahmed Ağa, Mikail v. İstefan, Bedros v. Begos, Serkiz v. Aleksan.