İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 222 Hüküm no: 197 Orijinal metin no: [58b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Helvacıbaşı Ali Ağa b. Mustafa’nın Küçük Ayasofya Hüseyin Ağa Mahallesi’ndeki menzilini Mehmed Ârif Molla Efendi’ye iki bin guruşa sattığı Mahmiye-i İstanbul’da Küçük Ayasofya’da Hüseyin Ağa Mahallesi sükkânından hâlâ Helvâcıbaşı Ali Ağa b. Mustafa tarafından husûs-ı âtiyyü’z-zikrde vekîl olduğu Habbâzân Kethudâsı Mustafa Ağa b. Abdullah ve el-Hâc Ali b. Abdullah şehâdetleriyle sâbit olan Helvâcı Halil Ağa b. Ömer nâm kimesne meclis-i şer‘-i hatîr-i lâzımü’t-tevkīrde sâbıkā Rumeli Kādıaskeri merhûm ve mağfûrun-leh Mehmed Murad Efendi hazretlerinin mahdûm-ı necâbet-mersûmları sagīr Mehmed Ârif Molla Efendi’nin nâzırları kuzât-ı kirâmdan bâ‘isü’l-kitâbi’l-müstetâb Mustafa Efendi b. Halil nâm kimesne mahzarında bi’l-vekâle ikrâr-ı tâm ve takrîr-i kelâm edip işbu akd-i âti’z-zikrin sudûruna değin müvekkilim merkūm Ali Ağa’nın yedinde mülk ve hakkı olup mahalle-i mezbûrede vâki‘ bir tarafdan Mîrî Yoğurtçubaşısı Abdullah Ağa menzili ve bir tarafdan el-Hâc Ahmed zevcesi menzili ve bir tarafdan Camcı Salih Çelebi menzili ve taraf-ı râbi‘i tarîk-i âm ile mahdûd dâhiliye ve hâriciyede fevkānî ve tahtânî büyût-ı adîde ve müştemilât-ı sâire-i ma‘lûmeyi muhtevî bir bâb mülk menzilini nâzır-ı merkūm Mustafa Efendi’ye tarafeynden îcâb ve kabûlü hâvî bi-tarîkı’l-istiğlâl iki bin guruşa bi’l-vekâle bey‘ ve teslîm eylediğimde, ol dahi ber-vech-i muharrer iştirâ ve tesellüm ve kabûl edip ve meblağ-ı mezkûr iki bin guruşu sagīr-i mûmâ-ileyhin mâlından olmak üzere merkūm Mustafa Efendi yedinden bi’t-tamam ve’l-kemâl ahz ü kabz eylediğinden sonra nâzır-ı merkūm [59a] efendi menzil-i mahdûd-ı mezkûru gıbbe’t-tahliyeti’ş-şer‘iyye ve’t-takābuzi’l-mer‘î târih-i kitâbdan bir sene tamamına değin beher şehir yirmi beşer guruşa müvekkilim merkūm Ali Ağa’ya îcâr ve teslîm, ol dahi ber-minvâl-i muharrer istîcâr ve kabûl eyledi dediğini merkūm Mustafa Efendi tasdîk etmeğin mâ-vaka‘a bi’t-taleb ketb olundu. Fî 2 min-Şa‘bân sene [1]194. Şuhûdü’l-hâl: Şâhidûne’s-sâbıkūn-ı Müslimûn.