İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 223 Hüküm no: 198 Orijinal metin no: [59a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ümmühani Hanım bt. Mustafa Ağa’nın Âşık Paşa Mahallesi’ndeki bahçeyi Mehmed Reşid Efendi b. Abdurrahman’a bin sekiz yüz on altı guruşa sattığı Husûs-ı âti’l-beyânın mahâllinde ketb ü tahrîri’çün bi’l-iltimâs cânib-i şer‘-i münîrden irsâl olunan Merhabâzâde Mahmud Efendi mahmiye-i İstanbul’da Âşık Paşa Mahallesi’nde vâki‘ Ümmühani Hanım’ın menziline varup zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i Nebevî eyledikde, zâtı es-Seyyid İbrahim Çelebi b. Ahmed ve Osman b. Mustafa ta‘rîfleriyle mu‘arrefe olan mezbûre Ümmühani Hanım bt. Kasabbaşı-i sâbık Mustafa Ağa meclis-i ma‘kūd-ı mezkûrda bâ‘isü’l-kitâb kuzâtdan Mehmed Reşid Efendi b. Abdurrahman mahzarında ikrâr-ı tâm ve takrîr-i kelâm edip mahalle-i mezbûrede vâki‘ bir tarafdan kuzâtdan Ali Efendi menzili ve ba‘zan Gürcü İbrahim menzili ve bir tarafdan Çadırcı Mustafa menzili ve ba‘zan Selim Ağa menzili ve bir tarafdan Kalaycı Osman menzili ve ba‘zan es-Seyyid Mehmed Sadreddîn Efendi menzili ve bir tarafdan bâyi‘a-i mezbûre Ümmühani Hanım Bağçesi ile mahdûd bir zîr-i zemîn mahzen ve bir bi’r-i mâ’ ve sâlifü’z-zikr Selim Ağa ve Çadırcı Mustafa taraflarından olan taş dîvâr ve eşcâr-ı müsmire ve gayrı müsmireli mülk bağçe akd-i âti’z-zikrin sudûruna değin yedimde mülk ve hakkım olmağla, ben bağçe-i mahdûd-ı mezkûrun mârrü’z-zikr Ali Efendi ve es-Seyyid Sadreddîn Efendi taraflarından kadden birer ve arzen dokuzar zirâ‘ birer parmak mahâllini merkūm Mehmed Reşid Efendi’ye bir parça bâd-zehir mukābelesinde hîbe-i sahîha ile hîbe ve teslîm ve mâ‘adâ sekiz yüz seksen üç zirâ‘ mahâllini bi-cümleti’t-tevâbi‘ ve’l-levâhık ve kâffetü’l-hukūk ve’l-merâfık tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ile bin sekiz yüz on altı guruşa merkūm Mehmed Reşid Efendi’ye bey‘ ü temlîk ve teslîm eylediğimde, ol dahi dahi ber-vech-i muharrer ittihâb ve iştirâ ve temellük ve tesellüm ve kabz ü kabûl ettikden sonra semeni olan meblağ-ı mezbûr bin sekiz yüz on altı guruşu işbu meclis-i ma‘kūd-ı mezkûrda bana def‘ ve teslîm, ben-dahi yedinden bi’t-tamam ve’l-kemâl ahz ü kabz edip bey‘-i mezkûrun tağrîr ve gabnine müte‘allika âmme-i da‘vâdan merkūm Mehmed Reşid Efendi’nin zimmetini ibrâ ve ıskāt eyledim. Ba‘de’l-yevm bağçe-i mahdûd-ı mezkûrda benim asla ve kat‘â alâka ve medhalim kalmayup merkūm Mehmed Reşid Efendi’nin mülk-i müşterâsı ve hakk-ı sırfı olmuşdur, keyfe mâ yeşâ’ ve yahtâr mutasarrıf olsun dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahâllinde ketb ve tahrîr ve ma‘an mürsel ümenâ’-i şer‘le meclis-i şer‘a gelüp alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fî 6 min-Şa‘bân sene [1]194. Şuhûdü’l-hâl: Müderrisînden Nazillili es-Seyyid Ali Efendi b. es-Seyyid Mustafa, Müftizâde es-Seyyid Ali Efendi b. Mehmed Efendi, es-Seyyid İbrahim Çelebi b. Ahmed.