.:: İstanbul Kadı Sicilleri ::.


Ahi Çelebi Mahkemesi 1 Numaralı Sicil (H. 1063-1064 / M. 1652-1653)
cilt: 49, sayfa: 117
Hüküm no: 122
Orijinal metin no: [18b-5]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


İsak v. Avram’ın gön bahasından Ali Beşe’ye borcu olduğu

Tüccâr tâifesinden işbu râfi‘u’l-kitâb Ali Beşe b. Kenan meclis-i şer‘-i şerîfde mahmiye-i İstanbul’da Kedüz cemâ‘atinden İsak v. Avram nâm Yahûdi muvâcehesinde üzerine da‘vâ edip mezbûr İsak zimmetinde yedimden müşterâ ve makbûz kıymet ve mikdârı beynimizde ma‘lûm gön bahâsından ba‘de külli hesâb bin üç yüz akçe hakkım vardır, suâl olunup alıverilmek murâdımdır dedikde, gıbbe’s-suâl mezbûr İsak cevâbında fi’l-vâki‘ müdde‘î-i mezbûr Ali Beşe’ye vech-i muharrer üzere beynimizde kıymet ve mikdârı ma‘lûm gön bahâsından ba‘de külli hesâb bin üç yüz akçe deynim vardır deyü ikrâr u i‘tirâf etmeğin ikrârı mûcebince meblağ-ı mezbûru müdde‘î-i mezbûra edâ ve teslîme mezbûr İsak’a tenbîh olunup mâ-vaka‘a ketb olundu.

Fi’l-yevmi’l-hâmis ve’l-ışrîn min-Zilkadeti’ş-şerife li-sene selâse ve sittin ve elf.

Şuhûdü’l-hâl: Mahmud Beşe Çukadâr, el-Hâc Abdurrahman b. Hasan, Mehmed Beşe b. Abdullah, İbrahim Beşe b. Ali, İbrahim b. Hızır, Rıdvan b. Abdullah.