İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 224 Hüküm no: 199 Orijinal metin no: [59a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul nalçacılar esnafının kethudalığına Mehmed Usta b. Mustafa’nın tayin edildiği Âsitâne-i aliyye’de vâki‘ Na‘lçacı esnâfının yiğitbaşısı Süleyman Usta ve ihtiyârlardan Abdullah Usta ve Hüseyin Usta ve İsmail Usta ve Feyzullah Usta ve Ali Usta ve es-Seyyid İbrahim Usta ve Mehmed Usta ve diğer Mehmed Usta ve es-Seyyid Mustafa Usta ve Kâtib Osman Efendi meclis-i şer‘-i enverde her biri takrîr-i kelâm ve ta‘bîr ani’l-merâm edip kethudâmız olan Mustafa Usta umûr ve mesâlihimizi rü’yetde tekâsül ve aczi olup kethudâlıkdan bi’l-külliye keff-i yed etmekle, işbu râfi‘u’l-kitâb Sulumanastır’da dükkânı olan es-Seyyid Mehmed Usta b. Mustafa tâife-i mezbûre ustalarının kudemâsından örf ve âdetimize vâkıf ve nizâm ve intizâmımızı mûcib olan umûr ve ahvâlimize kemâ-yenbagī ârif ve her vechile kethudâlık hizmetini rü’yete kādir ve cümlemizin muhtârı olmağla, kıbel-i şer‘den mezbûr es-Seyyid Mehmed Usta [59b] üzerimize kethudâ nasb ve ta‘yîn olunmak matlûbumuzdur deyü iltimâs etmeleriyle, hâkim-i muvakki‘-i sadr-ı kitâb ‒rafe‘a kadrehû mevlâhü’l-Vehhâb‒ efendi hazretleri tâife-i mezbûrenin üzerlerine mezbûr es-Seyyid Mehmed Usta’yı kethudâ nasb ve ta‘yîn ve umûrlarını ber-mu‘tâd-ı kadîm rü’yet ve bir ferdi hilâf-ı şer‘-i mutahhar rencîde etmemek üzere tenbîh buyurduklarında, ol dahi kabûl ve hidemât-ı lâzımesini mahâllinde ikāmete ta‘ahhüd etmeğin mâ-vaka‘a bi’t-taleb ketb olundu. Hurrire fî 9 min-Şa‘bân [li-]sene [11]94. Şuhûdü’l-hâl: Mehmed Ağa b. Ahmed Kethudâ-yı muhzırân, Akşehirli Osman, Kemahî İbrahim.