İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 224 Hüküm no: 200 Orijinal metin no: [60b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ümmügülsüm bt. Mehmed’in boşandığı kocası Molla Mehmed Emin b. Ahmed’den mehir ve nafaka alacaklarını tahsil ettiği ve ibralaştıkları Mahmiye-i İstanbul’da Uzun Yusuf Mahallesi sâkinelerinden sinn ve cüssesinin bulûğa tahammülü olup bulûğunu mukırra ve mu‘terîfe olan mu‘arrefetü’z-zat Ümmügülsüm bt. Mehmed nâm hatun meclis-i şer‘-i hatîr-i lâzımü’t-tevkīrde zevc-i dâhili Molla Mehmed Emin b. Ahmed nâm kimesne mahzarında ikrâr-ı tâm ve takrîr-i kelâm edip mezbûr Molla Mehmed Emin zevc-i dâhilim olup beynimizde hüsn-i mu‘âşeret olmamağla, zimmetinde mütekarrir ve ma‘kūdün-aleyh olan sekiz bin akçe mehr-i müeccelim ve nafaka-i iddet-i ma‘lûmem üzerlerine ve me’ûnet-i süknâm dahi kendi üzerime olmak üzere zevcim mezbûr Molla Mehmed Emin ile muhâla‘a-i sahîha-i şer‘iyye hul‘ olduğumda, ol dahi hul‘-ı mezkûru ba‘de’l-kabûl hukūk-ı zevciyete ve ibtidâ’-i zevciyetden târih-i kitâba gelince bi’l-cümle hukūk-ı sâireye müte‘allika âmme-i de‘âvî ve mutâlebât ve kâffe-i eymân ve muhâsamâtdan ben mezbûr Molla Mehmed Emin’in zimmetini ibrâ-i âm ile ibrâ ve ıskāt, ol dahi kezâlik hukūk-ı zevciyete ve ibtidâ’-i zevciyetden târih-i kitâba gelince bi’l-cümle hukūk-ı sâireye müte‘allika âmme-i de‘âvî ve kâffe-i mutâlebâtdan benim zimmetimi ibrâ-i âm ile ibrâ ve ıskāt ve her birimiz âharın ber-vech-i muharrer ibrâsını kabûl eyledik dediğini mezbûr Molla Mehmed Emin tasdîk etmeğin mâ-vaka‘a bi’t-taleb ketb olundu. Fî 11 min-Şa‘bâni’l-mu‘azzam sene 1194. Şuhûdü’l-hâl: Mehmed Ağa b. Ahmed Kethudâ-yı muhzırân, Akşehirli Osman Çelebi, İsmail Çelebi b. Ali, Duhânî Ali Çelebi, Kemahî İbrahim.