İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 225 Hüküm no: 201 Orijinal metin no: [60b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çörekçiler Kethudası Osman Ağa b. Mahmud’un Ayasofya-i kebîr Camii yakınındaki çörekçi fırını gediğinin nısfını Münevvere Hatun bt. Abdullah’a olan borcuna karşılık bin guruşa satıp bir yıllığına aylık on iki buçuk guruşa kiraladığı Ayasofya’da çörekçi Âsitâne-i aliyye’de vâki‘ çörekçi esnâfının kethudâsı Osman Ağa b. Mahmud nâm kimesne meclis-i şer‘-i hatîr-i lâzımü’t-tevkīr ve lâzımü’t-tevfîrde İstanbul sâkinelerinden Münevvere Hatun bt. Abdullah nâm hatunun zevci tarafından husûs-ı âti’z-zikrde vekîl-i sâbitü’l-vekâle[si] es-Seyyid Osman Çavuş b. ( ) mahzarında ikrâr-ı tâm ve takrîr-i kelâm edip İstanbul’da Ayasofya-i kebîr Câmi‘-i şerîfi kurbünde vâki‘ bir bâb çörekçi fırını derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin nısfını ifrâz ve kemâl-i imtiyâz ile mümtâz edip müvekkile-i mezbûre Münevvere Hatun’dan istidâne ettiğim bin guruş mukābelesinde nısf-ı âlât-ı müfreze-i mezkûreyi tarafeynden îcâb ve kabûlü hâvî alâ-tarîkı’l-istiğlâl müvekkile-i merkūme Münevvere Hatun’a bey‘ ve teslîm eylediğimde, ol dahi ber-vech-i muharrer iştirâ ve tesellüm ve kabûl ve meblağ-ı mezkûr bin guruşu müvekkile-i merkūme yedinden bi’t-tamam ve’l-kemâl ahz ü kabz eylediğimden sonra müvekkile-i mezbûre Münevvere Hatun sâlifü’l-beyân nısf-ı âlât-ı müfrezeyi gıbbe’t-tahliyeti’ş-şer‘iyye ve’t-takābuzi’l-mer‘î târih-i kitâbdan bir sene tamamına değin beher şehir on ikişer buçuk guruşa bana îcâr ve teslîm, ben-dahi istîcâr ve tesellüm ve kabûl eyledim <> dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 16 min-Şa‘bân sene [1]194. [60a] Şuhûdü’l-hâl: el-Hâc Ahmed Ağa b. Hüseyin, Uncular Kethudâsı Mustafa Ağa, Yiğitbaşı es-Seyyid Mehmed Emin, Çörekçi Molla Ahmed.