İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 226 Hüküm no: 202 Orijinal metin no: [60a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ölen Uncu Nazar v. İsayi’nin vârislerinin Hocapaşa’daki uncu değirmenin dört hissesini borçlarını ödemek maksadıyla İsmail b. Abdullah’a müzâyede ile dokuz yüz guruşa sattıkları Fi’l-asl vilâyet-i Anadolu’da Divriği kazâsına tâbi‘ Zimra karyesi ahâlîsinden İstanbul’da Balat kurbünde Kürkçübaşı Mahallesi mütemekkinelerinden [mütemekkinlerinden] iken bundan akdem hâlik olan Uncu Nazar v. İsayi zimmînin verâseti zevcesi Marita bt. Tekfoz ile sulbî kebîr oğlu Avanes ve karye-i mezbûre mütemekkin[e]lerinden sulbiye kebîre kızı Tormanda ve Tekfurdağı mütemekkinlerinden olup elân İstanbul’da müsâfiren mütemekkin âhar oğlu Aranos zimmîye inhisârı tahakkukundan sonra hâlik-i mesfûrun terekesini semen-i misliyle âhara bey‘ ve semeninden düyûn-ı müsbetesini edâya cânib-i şer‘-i kavîmden bâ-hüccet-i şer‘iyye vasî nasb ve ta‘yîn olunan Bedros v. Begoz zimmî meclis-i şer‘-i hatîr-i lâzımü’t-tevkīrde uncu tâifesinden İsmail b. Abdullah nâm kimesne tarafından husûs-ı âti’z-zikri tasdîka vekîl olduğu Yiğitbaşı es-Seyyid Mehmed Emin b. Ahmed ve Molla Mustafa b. el-Hâc Mehmed nâm kimesneler şehâdetleriyle sâbit olan el-Hâc Ahmed Ağa b. Hüseyin Ağa mahzarında bi’l-vesâye ikrâr-ı tâm ve takrîr-i kelâm edip hâlik-i mesfûrun emlâkinden olup İstanbul’da Hocapaşa’da vâki‘ on altı sehim i‘tibâr olunan dört horoslu bir bâb uncu değirmeni derûnunda mevcûde beyne’l-hiref gedik ta‘bîr olunur dört re’s bargir ve sâir-i âlât-ı lâzıme-i ma‘lûmesinin düyûn-ı müsbetesi edâsı’çün taraf-ı şer‘den me’zûn olmamla, zikrolunan dört re’s bargir ve sâir âlât-ı ma‘lûmeyi tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile dört re’s bargir[e] mutasarrıf olup hâlik-i mesfûrun şerîki olan müvekkil-i mezbûr İsmail’e lede’l-müzâyede semen-i mislinden ezyed olduğu ihbâr olunan dokuz yüz guruşa bi’l-vesâye bey‘ ve temlîk ve teslîm eylediğimde, ol dahi ber-vech-i muharrer iştirâ ve temellük ve tesellüm ve kabz ü kabûl etmekle semeni olan meblağ-ı mezkûr dokuz yüz guruşu müvekkil-i mezbûr İsmail yedinden bi’l-vesâye ahz ü kabz edip zikrolunan dört re’s bargir ve sâir âlât-ı lâzıme-i ma‘lûme müvekkil-i mezbûr İsmail’in mülk-i müşterâsı ve hakk-ı sırfı olmuşdur, keyfe mâ yeşâ’ ve hasbe-mâ-yahtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 3 Şa‘bân sene [11]94. Şuhûdü’l-hâl: el-Hâc es-Seyyid Ahmed, es-Seyyid Mehmed Said, Sayıcı Osman Çelebi, es-Seyyid Molla Ahmed, Çörekçi Molla Ahmed.