İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 227 Hüküm no: 203 Orijinal metin no: [60a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerîfe Ayşe bt. Mustafa’nın Pirinçci Sinan Mahallesi’ndeki arsası vakıf olan menzilini Mehmed Emin Efendi b. İbrahim’e yedi yüz guruşa sattığı Mahmiye-i İstanbul’da Ebulfeth Sultân Mehmed Han Câmi‘-i şerîfi kurbünde Pirinçci Sinan Mahallesi’nde sâkine Şerîfe Âişe bt. es-Seyyid Mustafa nâm hatunun zevci ve tarafından husûs-ı âti’z-zikri ikrâra vekîl olduğu zât-ı mezbûreyi bi’l-ma‘rifeti’ş-şer‘iyye ârifân olan Ali Ağa b. Ali ve Mehmed Çelebi b. Ömer nâm kimesneler şehâdetleriyle sâbit olan es-Seyyid Abdullah Efendi b. Ömer nâm kimesne meclis-i şer‘-i hatîr-i lâzımü’t-tevkīrde işbu bâ‘isü’l-kitâb Hâfız el-Hâc Mehmed Emin Efendi b. İbrahim mahzarında bi’l-vekâle ikrâr-ı tâm ve takrîr-i kelâm edip işbu akd-i âtî sudûruna değin müvekkilem mezbûre Şerîfe Âişe Hatun’un yedinde mülkü olup mahalle-i mezbûrede vâki‘ bir tarafdan Pirinçci Sinan Câmi‘-i şerîfi ve bir tarafdan [60b] Ermeni odaları ve bir tarafdan Zeynep Hatun menzili ve bir tarafdan tarîk-i âm ile mahdûd arsası senede mahalle imâmlarına üç yüz altmış akçe mukāta‘a ile meşrûta vakıf binâsı mülk olan menzilini, bi-cümleti’t-tevâbi‘ ve’l-levâhık ve kâffetü’l-hukūk ve’l-merâfık tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ile merkūm el-Hâc Mehmed Emin Efendi’ye yedi yüz guruşa bey‘ ve temlîk ve teslîm eylediğinde, ol dahi dahi ber-vech-i muharrer iştirâ ve temellük ve tesellüm ve kabz ve kabûl eyledikden sonra semeni olan meblağ-ı [mezkûr] yedi yüz guruşu merkūm el-Hâc Mehmed Emin Efendi yedinden bi’t-tamam ve’l-kemâl ahz ve kabz edip fîmâ-ba‘d menzil-i mahdûd-ı mezkûrda müvekkilem merkūme Şerîfe Âişe Hatun’un asla ve kat‘â alâka ve medhali kalmayup müşteri-i merkūm el-Hâc Mehmed Emin Efendi’nin mülk-i müşterâsı ve hakk-ı sırfı olmuşdur, keyfe mâ yeşâ’ ve hasbe-mâ-yahtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 15 min-Şa‘bân sene [1]194. Şuhûdü’l-hâl: el-Hâc es-Seyyid Ömer b. es-Seyyid Abdurrahman, Hasan Ağa b. Ahmed, Mehmed Ağa b. Ahmed, es-Seyyid el-Hâc Mustafa.