İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 227 Hüküm no: 204 Orijinal metin no: [60b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Ömer Mahallesi’ndeki Hâce Ayşe bt. Mustafa’nın bostan ve menzilleri vakfı mütevelliliğine Emrullah Efendi b. Ali’nin tayin edildiği Dârü’l-hilâfeti’l-aliyye ve makarru’s-saltanati’s-seniyye’de câlis-i mesned-i şerî‘at-i garrâ olan efendiler hazerâtı nezâretlerinde [olan] âsûde evkāfdan mahmiye-i İstanbul’da es-Seyyid Ömer Mahallesi’nde bostan ve menâzil vakf eden merhûme Hâce Âişe bt. el-Hâc Mustafa nâm <> sahibetü’l-hayrın zevci el-Hâc Mehmed evlâdından Mehmed Ağa b. İsmail meclis-i şer‘-i hatîr-i lâzımü’t-tevkīrde yine evlâd-ı vâkıfdan işbu bâ‘isü’l-kitâb el-Hâc Emrullah Efendi b. Ali mahzarında ikrâr-ı tâm ve takrîr-i kelâm edip vâkıfe-i mûmâ-ileyhâ işbu bir kıt‘a vakfiye-i ma‘mûlün-bihâ nâtıka olduğu üzere vakf-ı mezbûrun tevliyetini hayatda oldukça kendüye ve ba‘de vefâtihâ zevci el-Hâc Mehmed’e, ba‘de vefâtihî mezbûrun evlâd-ı zükûruna ve evlâd-ı evlâd-ı zükûruna ve ba‘de’l-inkırâz mahalle-i mezbûre imâmına şart ve ta‘yîn eylediği vakfının meşrûtiyyet üzere mütevellîsi olan ( ) fevt ve nevbet-i tasarruf-ı tevliyet benimle merkūm el-Hâc Emrullah Efendi’ye ale’l-iştirâki’s-seviy intikāl etmekle, tevliyet-i mezkûre ber-mûceb-i şart-ı vâkıfe bizlere tevcîh iktizâ etmeğin lâkin ben hissemden keff-i yed ve mecmû‘-ı tevliyet müteveffâ-yı mezbûrun fevtinden ve benim keff-i yedimden merkūm el-Hâc Emrullah Efendi’ye tevcîh olunsun dedikde, tevliyet-i mezkûre kadîmü’l-eyyâmdan berü şart-ı mezkûr üzere zabt ve tasarruf olunagelüp ve merkūm el-Hâc Emrullah Efendi tevliyet-i mezkûre uhdesinden gelmeğe kādir idiği zeyl-i kitâbda muharrerü’l-esâmî Müslimîn ihbârlarıyla lede’ş-şer‘i’l-enver zâhir ve mukarrer oldukdan sonra hâkim-i muvakki‘-i sadr-ı kitâb bi-tevkī‘ihi’r-refî‘ü’l-müstetâb ‒veffakallâhu te‘âlâ ilâ sebîli’s-savâb‒ efendi hazretleri dahi merkūm el-Hâc Emrullah Efendi’yi ber-mûceb-i şart-ı vâkıfe vakf-ı mezbûra mütevellî nasb ve ta‘yîn buyurduklarında, ol dahi kabûl ve hizmet-i lâzımesini kemâ-yenbagī edâya ta‘ahhüd ve iltizâm etmeğin mâ-vaka‘a bi’t-taleb ketb olundu. Fî 19 Şa‘bân sene [1]194. Şuhûdü’l-hâl: Hâfız Mehmed Tahir Efendi b. el-Hâc Mehmed, Hasan Ağa b. el-Hâc Abdurrahman, Hasan Ağa b. Ömer, Mehmed Efendi b. Hasan.