İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 228 Hüküm no: 205 Orijinal metin no: [61a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Âbid Molla Efendi b. Dürrîzâde Mehmed Nurullah Efendi’nin rüştünü ispat ederek vasîdeki tereke hissesini teslim aldığı Mahmiye-i İstanbul’da Sultân Mehmed kurbünde Mi‘mâr Sinan Mahallesi sâkinlerinden olup Rumeli Kādıaskeri iken bundan akdem vedâ‘-ı âlem-i fânî eden cennet-mekân Dürrîzâde Mehmed Nurullah Efendi merhûmun mahdûm-ı muhteremleri olup ve on yedi yaşını tekmîl ve cüssesi bulûğa mütehammil olmağla bulûğunu mu‘terîf ve ber-vech-i âtî rüşdünü iddi‘â eden müderrisîn-i kirâmdan sa‘âdetlü Mehmed Âbid Molla Efendi meclis-i şer‘-i şerîf-i Nebevî’de, bâ-hüccet-i şer‘iyye vasîsi müderrisînden bâ‘isü’l-kitâbi’l-müstetâb Abdülhalim Efendi b. el-Hâc Ahmed mahzarında üzerine da‘vâ ve takrîr-i kelâm edip ben on yedi yaşında olup hâlâ âkıl ve bâliğ ve reşîd ve bulûğuma rüşdüm munzam olup umûrumu bi’n-nefs rü’yete kādir ve i‘ânet-i vasîden müstağnî olmamla, vâlidim merhûm-ı müşârün-ileyhin mecmû‘-ı terekesinden bana isâbet eden mûmâ-ileyh Abdülhalim Efendi’nin bi’l-vesâye makbûzlarını bana teslîme mûmâ-ileyh Abdülhalim Efendi tenbîh olunmak matlûbumdur deyü da‘vâ ettiğimde, vasî-i mûmâ-ileyh dahi ber-minvâl-i muharrer hisse-i irsiyesini bi’l-vesâye kabzını ikrâr lâkin müdde‘î-i mûmâ-ileyhin rüşdünü inkâr edicek müdde‘î-i mûmâ-ileyh Mehmed Âbid Molla Efendi’den ber-vech-i muharrrer müdde‘âsını mübeyyine beyyine taleb olundukda udûl-i ahrâr-ı ricâl-i Müslimînden ve müderrisînden es-Seyyid Ali Efendi b. es-Seyyid Ali ve Mustafa Efendi b. Mehmed ve es-Seyyid İbrahim Efendi b. es-Seyyid Ahmed Efendi ve Debbağzâde Mehmed Reşid Efendi ve Murad Efendi b. Abdullah Efendi ve Feyzullah Efendi b. Hasan li-eclis’ş-şehâde meclis-i şer‘a hâzırûn olup isre’l-iştişhâd, fi’l-hakīka müdde‘î-i mûmâ-ileyh Mehmed Âbid Molla Efendi on yedi yaşında olup âkıl ve bâliğ ve reşîd ve bulûğuna rüşdü munzam ve umûrunu bi’n-nefs rü’yete kādir ve i‘ânet-i vasîden müstağnî olduğu bizim ma‘lûmumuzdur bizler bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettiklerinde gıbbe’t-ta‘dîl ve’t-tezkiye şehâdetleri makbûle olmağın mûcebiyle ba‘de’t-tenbîh mûmâ-ileyh Mehmed Âbid Molla Efendi meclis-i şer‘de mûmâ-ileyh Abdülhalim Efendi mahzarında i‘âde-i kelâm edip vâlidim cennet-mekân-ı merhûm-ı müşârün-ileyh Mehmed Nurullah Efendi’nin terekesinden hisse-i irsiyeme isâbet edip vasîm mûmâ-ileyh Abdülhalim Efendi’nin bi’l-vesâye makbûzu olan meblağdan on altı bin iki yüz elli guruşu vasîm mûmâ-ileyh bana def‘ ü teslîm, ben-dahi yedinden bi’t-tamam ve’l-kemâl ahz ü kabz ve cânib-i mîrîden ber-vech-i mâlikâne olduğum Filibe mukāta‘ası sihâmından bir sehim ve İstanbul Duhan Gümrüğü sihâmından rub‘ sehim hisselerin mu‘accele ve harc-ı berevâtı’çün cânib-i mîrî ve aklâma harc ve sarf ettim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 27 min-Şa‘bân sene [1]194. Şuhûdü’l-hâl: Müderrisîn-i kirâmdan Keçecizâde Mehmed Salih Efendi, Vekāyi‘ Kâtibi Mehmed Emin Efendi, Kethudâ-yı Muhzırân Mehmed b. Ahmed, Çukadar Süleyman.