İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 229 Hüküm no: 206 Orijinal metin no: [61a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şehremini Ereğli Mahallesi’ndeki nısf menzilin eş-Şeyh Mehmed Sırrî Efendi Zaviye Vakfı’na ait olduğu ve tasarrruf eden Derviş Ahmed b. Mehmed’e yüz guruşa kiralandığı Mahmiye-i İstanbul’da Şehremîni kurbünde Ereğli Mahallesi’nde vâki‘ merhûm Remlî Efendi demekle ma‘rûf eş-Şeyh Mehmed Sırrî Efendi’nin binâ ve inşâ eylediği zâviye vakfının evlâdiyet ve meşrûtiyet üzere mütevellîsi es-Seyyid eş-Şeyh Mehmed Emin meclis-i şer‘-i hatîr-i lâzımü’t-tevkīrde Dervîş Ahmed b. el-Hâc Mehmed nâm kimesne muvâcehesinde üzerine da‘vâ ve takrîr-i kelâm edip vakf-ı mezkûr musakkafâtından olup zikrolunan Şehremîni kurbünde İskender Ağa Mahallesi’nde vâki‘ bir tarafdan Zeliha Hatun mülkü ve üç tarafdan tarîk-i âm ile mahdûd ve fevkānî ve tahtânî büyût-ı adîdeyi müştemil bir bâb vakıf zâviyeye Dervîş Abdülkadir ve karındaşı [61b] Dervîş Ahmed nâm kimesneler ale’l-iştirâki’s-seviy bi’l-icâreteyn mutasarrıflar iken mezbûr Dervîş Abdülkadir bilâ-veled fevt olup nısf hissesi cânib-i vakfa âid ve râci‘ olmuş iken mezbûr Dervîş Ahmed nısf hisse-i mahlûleye bi-gayr-ı hakkın vaz‘-ı yed eder, suâl olunup kasr-ı yedine tenbîh olunmak bi’t-tevliye murâdımdır deyü da‘vâ ettikde mezbûr Dervîş Ahmed cevâbında vakf-ı mezkûrdan olmak üzere nısf-ı menzile vaz‘-ı yedini ikrâr lâkin vakf-ı mezkûrun sâbıkā kāimmakām-ı mütevellîsi olup hâlâ Ayasofya-i kebîr Câmi‘-i şerîfi şeyhi olan es-Seyyid el-Hâc Mehmed Emin Sırrî Efendi seksen sekiz senesi Rebî‘ülûlâ gurresi târihiyle müverrah yedime verdiği bir kıt‘a temessükde bizler her ne binâ eder isek kendi mülkümüz olmak üzere tasarrufumuza izin verdikden sonra bizler dahi menzil-i mezkûrun ba‘zı mahallerini hedm ve enkāz-ı mevkūfe ile ba‘zı mahallerini ta‘mîr etmemle menzil-i mezkûr mülküm olmuş olur bu vechile mülkiyet üzere vaz‘-ı yed ederim deyü eylediği def‘inde menzil-i mezkûrun vakf-ı merkūmdan olduğunu mu‘terîf iken mülkiyet üzere vaz‘-ı yed ederim demesi sahîh olmadığından kelâmına iltifât olunmayup ikrârı mûcebince nısf-ı menzil-i mezkûru mütevellî-i merkūma teslîm etmek üzere merkūm Dervîş Ahmed’e ba‘de’t-tenbîh mütevellî-i merkūm es-Seyyid eş-Şeyh Mehmed Emin Efendi meclis-i mezkûrda i‘âde-i kelâm edip nısf-ı menzil-i mezkûru yüz guruş bedel-i makbûz mukābelesinde mezbûr Dervîş Ahmed’e bi’t-tevliye îcâr ve tefvîz eylediğimde, ol dahi ber-vech-i muharrer istîcâr ve kabûl eyledi dediğini mezbûr Dervîş Ahmed tasdîk etmeğin mâ-vaka‘a bi’t-taleb ketb olundu. Fî 23 Şa‘bân sene [1]194. Şuhûdü’l-hâl: Mehmed Ağa b. Ahmed Kethudâ-yı Muhzırân, Kemahî İbrahim Çelebi, İsmail Çelebi b. Ali, Akşehirli Osman Çelebi, Mehmed Said.