İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 230 Hüküm no: 207 Orijinal metin no: [61b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Küçük Kostantin v. Yorgi’nin Bahçekapı dışındaki francalacı fırını gediği işletme nöbetini Aci Kostantin v. Mihal’e iki seneliğine bin sekiz guruşa kiraladığı Francalacı tâifesinden olup Bahçe Kapısı hâricinde vâki‘ bir bâb francala fırını derûnunda mevcûde gedik ta‘bîr olunur âlât-ı lâzıme-i ma‘lûmenin nısf-ı şâyi‘ine mutasarrıf olan Küçük Kostantin v. Yorgi nâm zimmî meclis-i şer‘-i hatîr-i lâzımü’t-tevkīrde francalacı tâifesinden olup âlât-ı lâzımenin nısf-ı şâyi‘-i âharına mutasarrıf olan Aci Kostantin v. Mihal zimmînin şerîki ve tarafından husûs-ı âtiyyü’z-zikri ikrâra vekîl-i şer‘îsi Yorgi v. Mihal muvâcehesinde ikrâr-ı tâm ve takrîr-i kelâm edip fırın-ı mezkûrda olan âlât-ı mezkûre müvekkil-i mesfûr ile ale’l-iştirâki’s-seviy yedimizde mülkümüz ve her birimiz birer sene mühâyeten zabt ve tasarruf ve işbu sene-i mübâreke Recebi’l-ferdi gāyetinde müvekkil-i mesfûrun vakti tamam ve nevbet-i mühâyât bana gelmiş olup, ben zamân-ı nevbetimde tasarruf edeceğim nısf-ı âlât-ı mezkûreyi işbu sene-i mübâreke Şa‘bânü’l-mu‘azzamı gurresinden bir sene tamamına değin dokuz yüz guruşa müvekkil-i mesfûr içün vekîl-i mezbûra îcâr ve teslîm, ol dahi ber-vech-i muharrer istîcâr ve kabûl edip doksan beş senesi Recebi’l-ferdi gāyetinde ve nevbet-i mühâyete tamam oldukda ve nevbet-i mühâyete müvekkil-i mesfûra gelüp, ol dahi doksan beş senesi Şa‘bân-ı şerîfi gurresinden zabt ve doksan altı Recebi’l-ferdi gāyetinde nevbeti tamam olup nevbet-i mühâyât bana iktizâ etmekle, ben nevbet-i mühâyemi doksan altı senesi Şa‘bân-ı şerîfi gurresinden <> [62a] doksan yedi senesi Recebi’l-ferdi gāyetine değin kezâlik dokuz yüz [guruşa] müvekkil-i mezbûr içün vekîl-i mezbûra îcâr ve teslîm, ol dahi ber-vech-i muharrer istîcâr ve kabûl ve seneteyn-i mezkûreteynde iktizâ eden bin sekiz yüz guruşu vekîl-i mesfûr Yorgi zimmî yedinden tamamen ve kâmilen ahz ü kabz edip zikrolunan doksan yedi senesi Şa‘bânü’l-mu‘azzamı gurresinden nevbet-i tasarruf müvekkil-i mesfûr Aci Kostantin’in olup benim zikrolunan iki senede asla ve kat‘â alâka ve medhalim kalmamışdır dediğini vekîl-i mesfûr Yorgi tasdîk etmeğin mâ-vaka‘a bi’t-taleb ketb olundu. Fî 27 min-Şa‘bân sene [1]194. Şuhûdü’l-hâl: el-Hâc Ahmed Ağa, Habbâzân Kethudâsı Mustafa Ağa, Uncular Kethudâsı Mustafa Ağa, Yiğitbaşı es-Seyyid Mehmed Emin Ağa, Mikail v. İstefan, Vartan v. Tomas, Bedros v. Begos.