İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 231 Hüküm no: 208 Orijinal metin no: [62a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ekmekçi Mehmed Said Ağa b. Mustafa’nın Beylerbeyi’ndeki ekmekçi fırını ve değirmeninin beş hissesini Panos v. Serkiz’e iki bin altı yüz guruşa sattığı Habbâz tâifesinden es-Seyyid Mehmed Said Ağa b. el-Hâc Mustafa nâm kimesne meclis-i şer‘-i hatîr-i lâzımü’t-tevkīrde habbâz tâifesinden bâ‘isü’s-sifr Panos v. Serkiz nâm zimmî muvâcehesinde ikrâr-ı tâm takrîr-i kelâm edip medîne-i Üsküdar’a muzâfe Beylerbeyi’de vâki‘ müceddeden binâ olunan bir bâb ekmekçi fırını ve ona merbût yirmi sehim i‘tibâr olunan beş horoslu bir bâb değirmen derûnunda mevcûde gedik ta‘bîr olunur yirmi re’s bargir ve sâir âlât-ı lâzıme-i ma‘lûmeden on beş re’s bargiri yedimde ibkā ve beş re’s bargir ve sâir âlât-ı lâzıme-i ma‘lûmeyi tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile mesfûr Panos zimmîye iki bin altı yüz guruşa bey‘ ve temlîk ve teslîm eylediğimde, ol dahi ber-vech-i muharrer iştirâ ve temellük ve tesellüm ve kabz ü kabûl ettikden sonra semeni olan meblağ-ı mezbûr iki bin altı yüz guruşu mesfûr Panos zimmî yedinden bi’t-tamam ve’l-kemâl ahz ü kabz edip bey‘-i mezkûrun tağrîr ve gabnine ve gedik husûsuna müte‘allika âmme-i de‘âvî ve kâffe-i mutâlebâtdan mesfûr Panos zimmînin zimmetini ibrâ-i <> âm ile ibrâ ve ıskāt edip fîmâ-ba‘d zikrolunan beş re’s bargir ve beş re’s bargire isâbet eden sâir âlât-ı lâzıme-i ma‘lûmede benim asla ve kat‘â alâka ve medhalim kalmayup müşteri-i mesfûr Panos zimmînin mülk-i müşterâsı ve hakk-ı sırfı olmuşdur, keyfe mâ yeşâ’ ve yahtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 27 min-Şa‘bân sene [1]194. Şuhûdü’l-hâl: Şâhidûn-ı sâbıkūn-ı Müslimûn.