İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 232 Hüküm no: 209 Orijinal metin no: [62b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ekmekçi Mehmed Said Ağa b. Mustafa’nın Beylerbeyi’ndeki ekmekçi fırını ve değirmeninin üç hissesini Arutin v. Ağyazar’a bin iki yüz guruşa sattığı Habbâz tâifesinden es-Seyyid Mehmed Said Ağa b. el-Hâc Mustafa nâm kimesne meclis-i şer‘-i şerîf-i enverde habbâz tâifesinden bâ‘isü’s-sifr Arutin v. Ağyazar nâm zimmî muvâcehesinde ikrâr-ı tâm takrîr-i kelâm edip medîne-i Üsküdar’a muzâfe Beylerbeyi’de vâki‘ müceddeden binâ olunan bir bâb ekmekçi fırını ve ona merbût yirmi sehim i‘tibâr olunan beş horoslu bir bâb değirmen derûnunda mevcûde gedik ta‘bîr olunur yirmi re’s bargirden mutasarrıf olduğum on beş re’s bargir ve sâir âlât-ı lâzıme-i ma‘lûmenin on iki re’sini yedimde ibkā ve bâkī üç re’s bargir ve sâir âlât-ı lâzıme-i ma‘lûmemi tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î <> ve safka-i vâhide ile mesfûr Arutin zimmîye bin iki yüz guruşa bey‘ ve temlîk ve teslîm, ol dahi ber-vech-i muharrer iştirâ ve temellük ve tesellüm ve kabz ü kabûl ettikden sonra semeni olan meblağ-ı mezkûr bin iki yüz guruşu mesfûr Arutin zimmî yedinden bi’t-tamam ve’l-kemâl ahz ü kabz edip bey‘-i mezkûrun tağrîr ve gabnine ve gedik husûsuna müte‘allika âmme-i de‘âvî ve kâffe-i mutâlebâtdan mesfûr Arutin zimmînin zimmetini ibrâ-i âm ile ibrâ ve ıskāt edip fîmâ-ba‘d zikrolunan üç re’s bargir ve üç re’s bargir[e] isâbet eden sâir âlât-ı lâzıme-i ma‘lûmede benim asla ve kat‘â alâka ve medhalim kalmayup müşteri-i mesfûr Arutin zimmînin mülk-i müşterâsı ve hakk-ı sırfı olmuşdur, keyfe mâ yeşâ’ ve yahtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 27 min-Ş sene [1]194. Şuhûdü’l-hâl: el-Hâc Ahmed, Yiğitbaşı es-Seyyid Mehmed Emin, Çörekçi Molla Ahmed, Molla Mustafa.