İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 238 Hüküm no: 216 Orijinal metin no: [64b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul ayakta hasır gezdiriciler taifesinin başeskisi İsmail b. Ömer Hanteri ile Salim Hanteri’ye çocuksuz vefat sebebiyle boş kalan hasırcı dükkânının aylık on guruşa kiralandığı Hasırcı nizâmı Mahmiye-i İstanbul’da ayakda hasır gezdirici makūlesinden yirmi nefer müseccelü’l-esâmî kimesnelerden Hüseyin b. Ali nâm kimesne meclis-i şer‘-i hatîr-i lâzımü’t-tevkīrde Hasırcılar Kethudâsı el-Hâc Mehmed ve Yiğitbaşı es-Seyyid Mustafa ve ihtiyârlardan el-Hâc Ömer ve el-Hâc Ali ve el-Hâc Ahmed ve Mu‘allim Atıyye ve es-Seyyid Mehmed ve el-Hâc Yusuf ve Molla Mehmed ve el-Hâc Hasan ve Molla Hüseyin ve Molla İbrahim ve es-Seyyid Halil Efendi hazır oldukları hâlde ayakda hasır gezdiricilerin başeskisi olan bâ‘isü’l-kitâb İsmail b. Ömer Hanteri mahzarında takrîr-i kelâm ve ta‘bîr ani’l-merâm edip hasırcı tâifesinin şürût [ve] nizâmlarını hâvî olup yedlerinde olan emr-i âlî nâtık olduğu üzere İstanbul Balkapanı köşesinden Ketâncılar sûkuna varınca yirmi bir aded hasırcı dükkânı ve yirmi aded ayakda gezdirici olup ziyâde ve noksan olmayup ve dükkân ashâbından biri bilâ-veled fevt oldukda dükkânında âlât [65a] olmadığından gedik ta‘bîr olunmayup esnâf i‘tibâriyle dükkânı oğluna verilüp oğlu yoğise ayakda gezdiricilerden cümlesinin eskisi olan kimesneye verilmek bâ-fermân nizâm-yâfte olan şürût-ı mer‘iyyeden olup lâkin bu esnâda bilâ-veled fevt olan ammim el-Hâc Mehmed dükkânı ustalığını hayatında bana hîbe ve temlîk edip lâkin hîbe-i mezkûre hilâf-ı emr-i âlî ve mugāyir-i şürût olduğundan i‘tibâr olunmamak iktizâ eder iken esnâf-ı mezkûre hîbe-i mezkûra ri‘âyet ve emr-i âlîye itâ‘at zımnında gezdirici tâifesinin akdemi olup dükkân-ı mezkûra iskân olunacaklardan mezbûr İsmail Hanteri ile ma‘an dükkân-ı mezkûrda sâkin olmak üzere bi’l-ittifâk nizâm verilüp esnâf kethudâsı merkūm el-Hâc Mehmed dahi hasırcı tâifesinin dükkân sahibi olup bâ-hüccet-i şer‘iyye nâzırı olduğu sagīr İbrahim’in sûk-ı mezbûrda vâki‘ dükkânını gezdirici tâifesinden olup şerîkim olan mezbûr İsmail ile eskiliğinde beraber olan Sâlim Hanteri’ye beher şehir onar guruşa îcâr ve teslîm eylediğinde, ol dahi ber-vech-i muharrer rızâsıyla istîcâr ve kabûl ve i‘lâmda tahrîr olunan şürûta mürâ‘ât olunmak üzere her birimiz ta‘ahhüd eyledik dedikde mezbûr İsmail Hanteri ile hâzırûn-ı merkūmûn mukırr-ı merkūm Hüseyin’i cemî‘ kelimât-ı meşrûhasında tasdîk etmeğin mâ-vaka‘a bi’t-taleb ketb olundu. Fî 28 min-Şa‘bân sene 1194. Şuhûdü’l-hâl: Mehmed Emin Efendi, Mehmed Ağa b. Ahmed, es-Seyyid Mehmed Sâdık, Mustafa b. Ahmed, Kemahlı İbrahim.