İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 239 Hüküm no: 217 Orijinal metin no: [65a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Emin Ağa’nın vârislerinin Emin Nureddin Mahallesi’ndeki menzili Ayşe Hanım bt. Derviş Mehmed Efendi’ye altı bin guruşa satıp arsasını devrettiği Mahmiye-i İstanbul’da Şehzâde Câmi‘-i şerîfi kurbünde Emîn Nureddin Mahallesi sükkânından iken bundan akdem vefât eden el-Hâc Mehmed Emin Ağa’nın verâseti zevcesi Zeynep Hanım bt. Abdülkadir Ağa ile sulbî kebîr oğlu Abdülkadir Ağa’ya münhasıra ve tashîh-i meselesi sekiz sehimden olup sihâm-ı mezbûreden bir sehmi merkūme Zeynep Hanım’a ve yedi sehmi oğlu merkūm Abdülkadir Ağa’ya isâbeti tahakkukundan sonra merkūm Abdülkadir Ağa kendi tarafından asâleten ve vâlidesi merkūme Zeynep Hanım tarafından husûs-ı âti’z-zikri ikrâra vekîl olduğu zât-ı merkūmeyi bi’l-ma‘rifeti’ş-şer‘iyye ârifân olan el-Hâc Ali b. İbrahim ve Feyzullah Çelebi b. Süleyman nâm kimesneler şehâdetleriyle sâbit olan merkūm Abdülkadir Ağa meclis-i şer‘-i hatîr-i lâzımü’t-tevkīrde bâ‘is[et’]ül-kitâb Âişe Hanım bt. Derviş Mehmed Efendi’nin sulbî kebîr oğlu ve husûs-ı câ’i’z-zikri tasdîka vekîl olduğu kezâlik zât-ı merkūmeyi bi’l-ma‘rifeti’ş-şer‘iyye ârifân olan şâhidân-ı mezkûrân şehâdetleriyle mütehakkık olan Mehmed Emin Bey b. el-merhûm el-Hâc Hüseyin Ağa mahzarında bi’l-asâle ve bi’l-vekâle ikrâr-ı tâm ve takrîr-i kelâm edip ashâb-ı hayrâtdan merhûme Fâtıma Hatun bt. İbrahim Ağa’nın zikrolunan Şehzâde Câmi‘-i şerîfi’nde vaz‘ eylediği şeyhü’l-kurrâ vakfından beher şehir doksanar akçe mukāta‘a-i kadîme ve üzerinde olan binâsı mülk olup on altı sehim i‘tibâriyle sekiz sehmi vâlidem merkūmenin mülkü ve sekiz sehmi babam müteveffâ-yı merkūmun ile’l-vefât [65b] yedinde mülkü ve ba‘de vefâtihî ber-tashîh-i mezkûr benimle vâlidem müvekkile-i merkūmeye ırsen isâbet ve intikāl edip bir tarafdan Ahmed Bey Hazînedârı Mehmed Ağa menzili ve bir tarafdan Ahmed Çelebi menzili ve bir tarafdan ba‘zan Şeyh Mustafa Efendi [menzili] ve ba‘zan vakf-ı mezkûrdan arsa-i hâliye ve bir tarafdan tarîk-i âm ile mahdûd müştemilât-ı ma‘lûmeyi hâvî bir bâb mülk menzilimi bi-cümleti’t-tevâbi‘ ve’l-levâhık ve kâffetü’l-hukūk ve’l-merâfık tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ile müvekkile-i merkūme Âişe Hanım’a altı bin guruşa bi’l-asâle ve bi’l-vekâle bey‘ ve temlîk ve teslîm ve arsasını bâ-ma‘rifet-i mütevellî ferâğ ve tefvîz eylediğimde, ol dahi ber-vech-i muharrer iştirâ ve temellük ve tesellüm ve tefevvüz ve kabz ve kabûl ettikden sonra semeni olan meblağ-ı mezkûr altı bin guruşu müvekkile-i merkūme Âişe Hanım yedinden bi’t-tamam ve’l-kemâl ahz ü kabz ve bi-kadri’l-hısas beynimizde iktisâm eyleyüp fîmâ-ba‘d menzil-i mahdûd-ı mezkûrun dokuz sehm-i şâyi‘inde vâlidem müvekkile-i merkūmenin ve yedi sehm-i şâyi‘inde benim asla ve kat‘â alâka ve medhalim kalmayup ebniyesi müvekkile-i merkūme Âişe Hanım’ın mülk-i <> müşterâtı ve arsası mülk-i müfevvezi olmuşdur, keyfe mâ teşâ’ ve tahtâr mutasarrıfe olsun dedikde merkūm Mehmed Emin Bey dahi mukırr-ı merkūmeyi tasdîk etmeğin mâ-vaka‘a bi’t-taleb ketb olundu. Fî 2 min-Şevval sene [1]194. Şuhûdü’l-hâl: Abdullah Ağa b. Abdullah, İbrahim, Cerrâh Mehmed Emin Ağa b. Salih, Ebûbekir b. Ali, Mustafa b. Abdullah.