İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 240 Hüküm no: 218 Orijinal metin no: [65b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsteryo v. Yani’nin vârislerinin Yedikule dışındaki şemhanenin bir buçuk hissesini Kostantin v. Yorgo’ya beş yüz guruşa sattıkları Şem‘-hâne Medîne-i Yenişehr-i Fener kazâsına muzâfe Agrafa nâhiyesine tâbi‘ Bihor karyesi mütemekkinlerinden iken bundan akdem hâlik olan İsteryo v. Yani v. Dimo zimmînin verâseti zevcesi Aksafine bt. Boliro nâm Nasrâniye ile li-ebeveyn kız karındaşları Agoriçe ve Aleksandire ve li-ebeveyn karındaşı oğulları Yano ve Kosta zimmîlere münhasıra ve tashîh-i meselesi yirmi dört sehimden olup sihâm-ı mezkûreden altı sehmi zevce-i mesfûreye ve sekiz sehmi kız karındaşları mesfûretân Agoriçe ve Aleksandire Nasrâniyelere ve birer sehmi karındaşı oğulları mesfûrân Yano ve Kosta zimmîlere isâbeti tahakkukundan sonra mesfûrûn Aksafine ve Agoriçe ve Aleksandire ve Yano ve Kosta nâm zimmîler taraflarından husûs-ı âtiyyü’z-zikri ikrâra vekîl olduğu Yorgi v. Kosta ve Yani v. Kosta nâm zimmîler şehâdetleriyle sâbit olan Kostantin v. Aleksi nâm zimmî meclis-i şer‘-i hatîr-i lâzımü’t-tevkīrde işbu bâ‘isü’l-kitâb Kostantin v. Yorgo nâm zimmî muvâcehesinde bi’l-vekâle ikrâr-ı tâm ve takrîr-i kelâm edip işbu akd-i âti’z-zikrin sudûruna değin müvekkillerim mesfûrların bi’l-irsi’ş-şer‘î yedlerinde mülk ve hakları olup İstanbul’da Yedikule hâricinde vâki‘ şem‘-hânelerden Debbağhâne kurbünde bir bâb kârhânede olup bir hissesi Yedikule’den ve nısf hissesi Ayakapusı’ndan i‘tibâr ile gedik ta‘bîr olunur bir buçuk hisselerini tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile mesfûr Kostantin zimmîye beş yüz guruşa bi’l-vekâle bey‘ ve temlîk ve teslîm ve ol dahi ber-vech-i muharrer iştirâ ve temellük ve tesellüm ve kabz ü kabûl ettikden sonra semeni olan meblağ-ı mezkûr beş yüz guruşu mesfûr Kostantin zimmî yedinden bi’l-vekâle bi’t-tamam ve’l-kemâl ahz ü kabz edip bey‘-i mezkûrun [66a] tağrîr ve gabnine ve istifâ-i semene ve gedik husûsuna müte‘allika âmme-i de‘âvî ve kâffe-i mutâlebâtdan mesfûr Kostantin zimmînin zimmetini ibrâ-i âm ile ibrâ ve ıskāt edip, ol dahi ibrâ-i mezkûru ba‘de’l-kabûl fîmâ-ba‘d zikrolunan bir buçuk hissede müvekkillerim mesfûrûnun asla ve kat‘â alâka ve medhalleri kalmayup müşteri-i mesfûr Kostantin zimmînin mülk-i müşterâsı ve hakk-ı sırfı olmuşdur, keyfe mâ yeşâ’ ve yahtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 29 Ramazan sene [1]194. Şuhûdü’l-hâl: Mehmed Ağa b. Ahmed Kethudâ-yı Muhzırân, Kemahî İbrahim Çelebi, İsmail Çelebi.