İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 241 Hüküm no: 219 Orijinal metin no: [66a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hoca Hayreddin Efendi ve Sitti Hatun vakıflarına ait Kastamonu’daki bazı musakkafatın nısfı kirasının yıllık yüz on guruşa çıkartıldığı Dârü’l-hilâfeti’l-aliyye ve makarru’s-saltanati’s-seniyye’de câlis-i mesned-i şerî‘at-i garrâ olan efendiler hazerâtı nezâretlerinde olan evkāfdan merhûm Hoca Hayreddîn Efendi nâm sahibü’l-hayr ile merhûme Sitti Hatun Evkāfları’nın evlâdiyet ve meşrûtiyyet üzere mütevellîsi olan Hâşim-zâde sagīr es-Seyyid Mesud’un bâ-hüccet-i şer‘iyye vasî-i muhtârı ve kāimmakāmı olan Hâfız Mehmed Emin Efendi b. Mustafa meclis-i şer‘-i hatîr-i lâzımü’t-tevkīrde Vilâyet-i Anadolu’da medîne-i Kastamonu ahâlîsinden olup kendi tarafından asıl ve karındaşı es-Seyyid Mehmed Ağa b. Hasan Ağa’nın vekîl-i sâbitü’l-vekâlesi bâ‘isü’l-kitâb es-Seyyid <> Mustafa Ağa nâm kimesne mahzarında ikrâr-ı tâm ve takrîr-i kelâm edip bi’l-meşrûta mütevellîsi olup kāimmakāmı olduğum vakf-ı merkūm musakkafâtından medîne-i mezkûrede vâki‘ lede’l-ahâlî ve’l-cîrân ma‘lûmü’l-hudûd ve’l-müştemilât çifte hamamın nısfıyla Kapan-ı dakīk ve selhhânenin nısflarının cüz’î ve küllî iktizâ eden ta‘mîr ve termîmleri kendi mâllarından olup vakfa teberru‘ etmek üzere bin yüz kırk senesi Rebî‘ülâhiri ibtidâsında mezbûrân es-Seyyid Mustafa Ağa ve karındaşı es-Seyyid Mehmed Ağa’nın büyük babaları el-Hâc Mustafa Ağa’ya târih-i merkūmda mütevellî bulunan La‘lîzâde es-Seyyid Mehmed Said Efendi nâzır-ı vakıf izniyle bâ-hüccet-i şer‘iyye bi’l-icâreteyn îcâr edip ve lâkin müeccele-i misliyesinden noksan senevî on bir bin akçe icâre-i müeccele ile istîcâr edip ba‘de vefâtihî babaları merkūm Hasan Ağa ve ba‘de vefâtihî mezbûrân es-Seyyid Mustafa [Ağa] ve karındaşı es-Seyyid Mehmed Ağa’ya âdiyen intikāl edip lâkin icâre-i mezkûre müeccele-i misliyesinden noksan olmağla icâre-i misliyesine iblâğ olunmak murâdımdır deyü ba‘de’d-da‘vâ ve’s-suâl ve ba‘de vukū‘ı’l-münâza‘a merkūm es-Seyyid Mustafa Ağa asâleten ve vekâleten işbu meclis-i şer‘de musakkafât-ı mezkûrenin icâre-i kadîmesi olan senevî on bir bin akçe üzerine iki bin iki yüz akçe zam ile icâre-i misliyesi olan yüz on guruşa iblâğ ve beher sene cânib-i vakfa edâ ve iktizâ eden cüz’î ve küllî ta‘mîr ve termîmini kemâ-fi’s-sâbık kendi mâllarından vakf-ı şerîfe teberru‘ etmek üzere ta‘ahhüd etmeğin, ben-dahi vech-i muharrer üzere bin yüz doksan dört senesi Muharremi’l-harâmı gurresinden senevî yüz on guruş icâre-i müeccele ile kemâ <> fi’l-evvel merkūmâna ibkā ve bi’l-icâreteyn tasarruflarına izin verdiğimde, ol dahi ber-vech-i muharrer asâleten ve vekâleten istîcâr ve kabûl edip mâdâm ki zikrolunan yüz on guruş icâre-i müecceleyi beher sene cânib-i vakfa edâ eyleyüp iktizâ eden cüz’î ve küllî ta‘mîr ve termîmini kendi mâllarından teberru‘ eyleyeler bi’l-icâreteyn tasarruflarına taraf-ı vakıfdan müdâhale olunmaya dedikde merkūm es-Seyyid Mustafa Ağa kāimmakām-ı merkūmu cemî‘ kelimât-ı meşrûhasında tasdîk etmeğin mâ-vaka‘a bi’t-taleb ketb olundu. Fî 15 min-Receb sene [1]194. Şuhûdü’l-hâl: Mehmed Ağa b. Ahmed Kethudâ-yı Muhzırân, İsmail b. Ali, Kemahî İbrahim b. ( ).