İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 242 Hüküm no: 220 Orijinal metin no: [66b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Anton v. Haçador’un Cevahir Bedesteni yakınındaki kuyumcu dükkânı gediğini Kirkor v. İsayi’ye kuyumcu esnafı nukud vakfına olan borcundan düşülmek üzere sekiz yüz guruşa sattığı Kuyumcu Kuyumcu tâifesinden olup kuyumcu esnâfının umûr-ı mühimmelerine mevkūfe nükūdun sâbıkā mütevellîsi olan Anton v. Haçador nâm zimmî meclis-i şer‘-i hatîr-i lâzımü’t-tevkīrde nükūd-ı mevkūfe-i mezbûrenin hâlâ bâ-hüccet-i şer‘iyye mütevellîsi bâ‘isü’s-sifr Kirkor v. İsayi nâm zimmî muvâcehesinde ikrâr-ı tâm ve takrîr-i kelâm edip işbu akd-i âti’z-zikrin sudûruna değin yedimde mülk ve hakkım olup İstanbul’da Cevâhir Bezzâsistânı civârında vâki‘ kuyumcu dükkânı derûnunda mevcûde beyne’l-hiref gedik ta‘bîr olunur âlât-ı lâzıme-i ma‘lûmemi tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ve safka-i vâhide ile mesfûr Kirkor zimmîye sekiz yüz guruşa bey‘ ve temlîk ve teslîm eylediğimde, ol dahi vakf-ı mezkûra mahkûmun-bih deynim olan beş bin beş yüz guruşun sekiz yüz guruşu mukābelesinde iştirâ ve temellük ve tesellüm ve kabz edip semeni olan meblağ-ı mezkûr sekiz yüz guruşu deyn-i mezkûrumun ol mikdârına takās ve mahsûb eylediğimde, ol dahi ber-vech-i muharrer mukāssa ve kabûl edip fîmâ-ba‘d zikrolunan dükkân derûnunda mevcûde âlât-ı ma‘lûmede benim asla ve kat‘â alâka ve medhalim kalmayup mütevellî-i mesfûr Kirkor zimmînin mülk-i müşterâsı olmuşdur, keyfe mâ yeşâ’ ve hasbe-mâ-yahtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 17 min-Şevval sene 1194. Şuhûdü’l-hâl: Mehmed Ağa b. Ahmed Kethudâ-yı Muhzırân, Kemahî İbrahim, İsmail b. Ali.