İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 243 Hüküm no: 221 Orijinal metin no: [66b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Eflak’dan İstanbul’a koyun getiren celeblerin hayvanların kesimi, satışı ve ücretler hususunda koyun kasaplarıyla yaptıkları mukavele Eflak celebânından Âsitâne-i <> sa‘âdet’e ağnam getiren celeb tâifesinden bin yüz koyun getiren Manto-oğlu Aleksi ve bin beş yüz koyun getiren Sarı Yani ve bin yüz koyun getiren Koca Yani ve bin dört yüz koyun getiren Çolak Anaştaş ve bin sekiz yüz koyun getiren Kosta meclis-i şer‘-i hatîr-i lâzımü’t-tevkīrde hâlâ kassâbân kethudâsı olup kassâbbaşı ağa vekîli olan el-Hâc Ali Ağa ve ihtiyâr ustalardan Ebûbekir Efendi ve İsmail Beşe ve Hacı Ahmed Usta ve diğer el-Hâc Ahmed Usta ve el-Hâc Ali Usta ve es-Seyyid Halil Usta ve Molla Mehmed Emin Usta ve sâir müseccelü’l-esâmî kasab ustaları mahzarlarında her biri ikrâr-ı tâm ve takrîr-i kelâm edip bizler mâlımız ile Âsitâne-i sa‘âdet’e sevk ve tesyîr eylediğimiz cem‘an altı bin dokuz yüz re’s ağnamımızı kasab tâifesi dükkânlarında zebh ve lühûmunu ibâdullâha bey‘ ve füruht eylemeleri içün kassâbân ile beher vakıyye lahm-ı ganemi yedişer paraya ve iç yağını narh-ı rûzîsi üzere on dokuz buçuk akçeye ve sakatları zebh ettikleri içün kasab ustalarına ücret ve beher re’s koyun içün beşer para kassâbâna çevirme nâmiyle vermek üzere beynimizde mukāvele ve bu vechile hesâblaşup ziyâde ve noksan teklîfi ile her birimiz âharı rencîde etmeyüp [67a] [defterde yer alan varaklandırma problemi giderilmiş olup 52b-53a’ya ciltlenmiş olan sayfalar metnin akışına göre yerine yerleştirilmiştir.] ve yevm-i kabzdan otuz bir gün tamamında yâftalarımızı ihrâc ve altmış bir gün tamamında akçelerimiz tamamen bizlere teslîm olunmak üzere her birimiz ta‘ahhüd ve ittifâk eyledik dediklerinde kassâbân tâifesi merkūmûn dahi celebân-ı mezkûreyi kelimât-ı meşrûhalarında tasdîk etmeleriyle mâ-vaka‘a bi’t-taleb ketb olundu. Fî 17 L sene [11]94. Şuhûdü’l-hâl: Mehmed Ağa b. Ahmed Kethudâ-yı muhzırân, İsmail Çelebi, Kemahî İbrahim.