İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 249 Hüküm no: 228 Orijinal metin no: [69a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Turşucuzâde Abdurrahim Efendi üzerine kızı Şerîfe Emine Hanım için günlük bir guruş nafaka takdir edildiği Mahmiye-i İstanbul’da Sultân Selim Câmi‘-i şerîfi kurbünde Nişancı-ı atîk Mahallesi sâkinelerinden bâ‘isetü’l-kitâb ismetlü Şerîfe Hadîce Münire Hanım bt. el-mevlâ el-merhûm el-mebrûr es-Seyyid Mehmed Emin Efendi b. el-merhûm el-mağfûr kādıasker-i esbak es-Seyyid Zeynelabidin Efendi hazretleri taraflarından husûs-ı âti’z-zikrde vekîl olduğu zât-ı mûmâ-ileyhâyı bi’l-ma‘rifeti’ş-şer‘iyye ârifân olan Molla Ebûbekir b. Ali ve Molla İsmail b. Mustafa nâm kimesneler şehâdetleriyle mahzar-ı hasm-ı şer‘îde sâbit olan Ali Efendi b. Mehmed meclis-i şer‘-i hatîr-i lâzımü’t-tevkīrde müvekkile-i mûmâ-ileyhânın zevc-i sâbıkı Turşucuzâde es-Seyyid Abdurrahîm Efendi mahzarında bi’l-vekâle takrîr-i kelâm ve ta‘bîr ani’l-merâm edip merkūm es-Seyyid Abdurrahîm Efendi’nin firâşından hâsıla ve zevcesi müvekkile-i mûmâ-ileyhâ Şerîfe Hadîce Münire Hanım’dan mütevellide ve bi-hakkı’l-hıdâne hacr ve terbiyesinde olan kerîmesi sagīre Şerîfe Emine Hanım’ın mâlı olmayup nafaka ve kisveye ihtiyâcı olmağla, sagīre-i mûmâ-ileyhânın nafaka ve kisvesi’çün babası merkūm es-Seyyid Abdurrahîm Efendi üzerine cânib-i şer‘-i mutahhardan kadr-ı ma‘rûf nafaka ve kisve-bahâ farz ve takdîr olunmak vâlidesi müvekkile-i mûmâ-ileyhânın bi’l-hıdâne matlûbudur dedikde gıbbe’t-tasdîkı’ş-şer‘î sagīre-i mûmâ-ileyhânın nafaka ve kisve-bahâsının kadr-ı ma‘rûfu beher yevm birer guruş olduğu vukūf-ı tâmmı olan kimesneler alâ-tarîkı’ş-şehâde meclis-i şer‘de eyledikleri haberleriyle mütehakkık oldukda, hâkim-i muvakki‘-i sadr-ı kitâb bi-tevkī‘ihi’r-refî‘ü’l-müstetâb ‒rafe‘a kadrehû mevlâhü’l-Vehhâb‒ efendi hazretleri [69b] dahi sagīre-i mûmâ-ileyhâ Şerîfe Emine Hanım’ın nafaka ve kisve ve havâyic-i lâzıme-i sâiresi’çün târih-i kitâbdan beher yevm birer guruş nafaka ve kisve-bahâ babası merkūm es-Seyyid Abdurrahîm Efendi üzerine farz ve takdîr buyurup meblağ-ı mefrûz-ı mezkûru sagīr[e]-i mûmâ-ileyhânın nafaka ve kisve ve havâyic-i zarûriyesine harc ve sarfa ve lede’l-iktizâ istidâneye ve inde’z-zafer babası merkūm üzerine rücû‘a vâlidesi müvekkile-i mûmâ-ileyhâ içün vekîl-i merkūm Ali Efendi’ye izin vermeğin mâ-vaka‘a bi’t-taleb ketb olundu. Fî 29 min-Şevval sene [1]194. Şuhûdü’l-hâl: Mehmed Ağa b. Ahmed Kethudâ-yı Muhzırân, Mehmed Emin Efendi, es-Seyyid Mehmed Sâdık Efendi, Molla Ebûbekir b. Ali.