İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 250 Hüküm no: 229 Orijinal metin no: [69b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Molla Mustafa b. Hasan ile Necibe bt. el-Hâc Mehmed’in Yeni Odalarbaşı’ndaki ekmek fırını ve Kırkçeşme’deki değirmenin kira bedeli davasında Feyzullah Beşe b. Mehmed ve ortakları ile anlaşıp ibralaştıkları İstanbul’da Yeni Odalar başında vâki‘ sagīr fırın demekle ma‘rûf bir bâb ekmekçi fırını ve ona merbût İstanbul’da Kırkçeşme kurbünde Peştemalciler kârhânesi ittisâlinde vâki‘ Otlukcı Yani değirmeni demekle ma‘rûf on altı sehim i‘tibâr olunur dört horoslu bir bâb değirmen derûnunda mevcûde beyne’l-hiref gedik ta‘bîr olunur sekiz re’s bargir ve sâir âlât-ı lâzıme-i ma‘lûmeye mutasarrıfân olan bâ‘isâ’l-kitâb Molla Mustafa b. Hasan ve Necibe bt. el-Hâc Mehmed tarafından husûs-ı âtiyyü’z-zikri ikrâra vekîl olduğu zâtını ârifân Molla Edhem b. Mehmed ve Mehmed Ağa nâm kimesneler şehâdetleriyle sâbit olan Yiğitbaşı es-Seyyid Mehmed Emin Çelebi b. Ahmed nâm kimesne meclis-i şer‘-i hatîr-i lâzımü’t-tevkīrde zikrolunan on altı re’s bargirden sekiz re’s bargire mutasarrıflar olan Feyzullah Beşe b. Mehmed ve şerîkleri Estoyan v. Esteloz ve Doyo v. Peço ve Yorgi v. Boğdan muvâcehelerinde her biri bi’l-asâle ve bi’l-vekâle ikrâr-ı tâm ve takrîr-i kelâm edip mutasarrıfân olduğumuz mârrü’l-beyân fırın ve değirmen icâresinden mezbûrlar zimmetlerinde bâkī icâreden müctemi‘a ma‘lûmü’l-mikdâr alacağımız olduğundan mâ‘adâ fırın-ı mezkûr ile değirmen-i merkūm mezbûrlara îcâr olundukda tağrîr ve gabn-i fâhiş ile îcâr olunmuşidi deyü da‘vâya tesâddî etmişidik. El-hâletü-hâzihî beynimize muslihûn tavassut edip işbu târih-i kitâba gelince beynimizde cereyân eden bi’l-cümle hukūk-ı ma‘lûme ve mechûleye müte‘allika âmme-i de‘âvî ve kâffe-i mutâlebâtdan mezbûrûndan her birinin zimmetini ibrâ-i âm ile ibrâ ve ıskāt eylediğimizde, onlar dahi ibrâ-i mezkûru kabûl eyledi dediklerini mezbûrûndan her biri ba‘de’t-tasdîk mezbûrân meclis-i ma‘kūd-ı mezkûrda i‘âde-i kelâm edip zikrolunan sekiz re’s bargirin her birini târih-i kitâbdan üç sene tamamına değin beher yevm beşer akçe icâreden bir ayda on guruşa bi’l-asâle ve bi’l-vekâle îcâr ve teslîm eylediğimizde, onlar dahi ber-vech-i muharrer istîcâr ve kabûl eylediklerinden sonra mârrü’l-beyân sekiz re’s bargirden hisse-i ma‘lûmem mukābelesinde iktizâ eden dört guruşu [70a] bana ve müvekkile-i mezbûre Necibe Hatun’un hisse-i ma‘lûmesi mukābelesinde iktizâ eden altı guruşu müvekkile-i mezbûreye edâ ve teslîm etmek üzere ta‘ahhüd eyledi <> dediğini mezbûrûndan her biri tasdîk etmeğin mâ-vaka‘a bi’t-taleb ketb olundu. Fî gurre-i Şevval sene [1]194. Şuhûdü’l-hâl: el-Hâc Ahmed Ağa, Abdi Efendi, Hamdullah Efendi, es-Seyyid Mehmed Said.