İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 251 Hüküm no: 230 Orijinal metin no: [70a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice bt. Hasan’a Emîn Bey Mahallesi’nde ırsen intikal eden menzildeki vasiyesi olduğu kızı Fâtıma’nın hissesini müzâyede ile satmasına izin verildiği Mahmiye-i İstanbul’da Sultân Bâyezid-i velî Câmi‘ [-i şerîfi] kurbünde Emîn Bey Mahallesi sükkânından iken bundan akdem fevt olan Pirinçci el-Hâc Mustafa b. Ali’nin verâseti zevce-i menkûha-i metrûkesi Hadîce bt. Hasan nâm hatun ile sulbî sagīr oğlu Mehmed Tahir ve sulbiye sagīre kızı Fâtıma’ya ba‘de’l-inhisâr kıble’l-kısmet mezbûr Mehmed Tahir dahi fevt olup verâseti vâlidesi mezbûre Hadîce Hatun ile li-ebeveyn kız karındaşı sagīre-i mezbûre Fâtıma’ya münhasıra ve tashîh-i meselesi bi-hükmi’l-münâsaha yüz yirmi sehimden olup sihâm-ı mezbûreden kırk üç sehmi vâlidesi mezbûre Hadîce Hatun’a ve yetmiş yedi sehmi kız karındaşı sagīre-i mezbûre Fâtıma’ya isâbeti tahakkukundan sonra mezbûre Hadîce Hatun kendiden asâleten ve sagīre-i mezbûrenin vâlidesi ve tesviye-i umûruna kıbel-i şer‘den bâ-hüccet-i şer‘iyye mansûbe vasîsi olmağla vesâyeten meclis-i şer‘-i hatîr-i lâzımü’t-tevkīrde ikrâr-ı tâm ve takrîr-i kelâm edip zikrolunan Emîn Bey Mahallesi’nde vâki‘ iki tarafdan Musâhib-i şehriyârî Hızır Ağa tasarrufunda olan menzil ve bir tarafdan Çukadâr Süleyman Ağa menzili ve taraf-ı râbi‘i tarîk-i âm ile mahdûd bir bâb kârgir mahzeni müştemil arsasının galle ve tevliyeti zikrolunan Emîn Bey Câmi‘-i şerîfi imâmlarına meşrûta senede dört yüz seksen akçe mukāta‘a ile üzerinde olan ebniyesi mûrisimiz müteveffiyân-ı mezbûrânın ile’l-vefât yedlerinde mülkü ve ba‘de vefâtihimâ tashîh-i mezkûr üzere bi’l-irsi’ş-şer‘î bizlere isâbet ve intikāl edip lâkin menzil-i mezkûrun şâyi‘an bekāsı sagīre-i mezbûre Fâtıma’ya muzırr olmağla, menzil-i merkūm kendi hisse-i şâyi‘a-i mezkûrem ile ma‘an bi’l-izni’ş-şer‘î lede’l-müzâyede ve inkıtâ‘i’r-rağbe semen-i misliyle âhara bey‘ ve semeninden sagīre-i mezbûrenin hissesi istirbâh ve istiğlâl olunmak sagīre-i mezbûr[e] hakkında enfa‘ ve evlâ olmağın menzil-i mezkûr ber-minvâl-i muharrer âhara bey‘a kıbel-i şer‘dan bi’l-vesâye me’zûn olmak matlûbumdur dedikde vasî-i merkūmun [vasiye-i merkūmenin] bi’l-cümle kelimât-ı meşrûhası vâkı‘a mutâbıka idüği zeyl-i vesîkada muharrrerü’l-esâmî Müslimîn haberleriyle lede’ş-şer‘i’l-enver zâhir ve mütebeyyin olmağın, hâkim-i muvakki‘-i sadr-ı kitâb bi-tevkī‘ihi’r-refî‘ü’l-müstetâb ‒tûbâ-lehû ve hüsnü-meâb‒ efendi hazretleri menzil-i mezkûru ber-minvâl-i muharrer semen-i misliyle âhara bey‘a vasiye-i mezbûre Hadîce Hatun’a izin vermeğin mâ-vaka‘a bi’t-taleb ketb olundu. Fî 3 min-Zilka‘deti’ş-şerîfe sene [1]194. Şuhûdü’l-hâl: Mehmed Emin Efendi, Molla Mustafa, es-Seyyid Mehmed Sâdık, Osman Çelebi, Mehmed Ağa b. Ahmed.