.:: İstanbul Kadı Sicilleri ::.


İstanbul Mahkemesi 44 Numaralı sicil (H. 1193-1194 / M. 1779-1780)
cilt: 78, sayfa: 252
Hüküm no: 231
Orijinal metin no: [70a-2]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Hatice bt. Hasan’ın Emin Bey Mahallesi’de ırsen intikal eden menzildeki hissesini ve vasiyesi olduğu küçük kızı Fâtıma’nın hissesini Hüseyin Ağa b. Süleyman Ağa’ya bin altı yüz guruşa sattığı

Vasiye-i mezbûre Hatun meclis-i şer‘-i hatîr-i lâzımü’t-tevkīrde işbu bâ‘isü’l-kitâb el-Hâc Hüseyin Ağa b. el-Hâc Süleyman Ağa mahzarında bi’l-asâle ve bi’l-vekâle ikrâr-ı tâm ve takrîr-i kelâm edip vech-i muharrer üzere olan mesûğ-ı şer‘îye binâen menzil-i mahdûd-ı mezkûru bi-cümleti’t-tevâbi‘ ve’l-levâhık ve kâffetü’l-hukūk ve’l-merâfık tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ile el-yevm semen-i misli olduğu kezâlik zeyl-i kitâbda mastûrü’l-esâmî Müslimîn ihbârlarıyla zâhir olan bin altı yüz guruşa merkūm el-Hâc Hüseyin Ağa’ya bi’l-asâle ve bi’l-vesâye bey‘ ü temlîk ve teslîm eylediğimde, ol dahi ber-vech-i muharrer iştirâ ve temellük ve tesellüm ve kabz ü kabûl ettikden sonra semeni olan meblağ-ı mezkûr bin altı yüz guruşun bin yirmi altı guruş [70b] seksen akçesini sagīre-i mezbûre Fâtıma içün ve bâkī beş yüz yetmiş üç guruş kırk akçesini kendi hisse-i şâyi‘am içün merkūm el-Hâc Hüseyin Ağa yedinden bi’l-asâle ve bi’l-vesâye tamamen ahz ü kabz eyledim. Fîmâ-ba‘d menzil-i mahdûd-ı mezkûrda benim ve vasiyyesi olduğum kızım sagīre-i mezbûrenin asla ve kat‘â alâka ve medhallerimiz kalmayup mezbûr el-Hâc Hüseyin Ağa’nın mülk-i müşterâsı ve hakk-ı sırfı olmuşdur, keyfe mâ yeşâ’ ve yahtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 5 Zilka‘de sene [1]194.

Şuhûdü’l-hâl: eş-Şâhidûne’l-mezbûrûn.