İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 252 Hüküm no: 232 Orijinal metin no: [70b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin Ağa b. Süleyman Ağa’nın Emin Bey Mahallesi’ndeki menzili Mehmed Ağa b. Ali’ye bin beş yüz guruşa sattığı Mahmiye-i İstanbul’da Sultân Bâyezid-i velî Câmi‘-i şerîfi kurbünde sâkin el-Hâc Hüseyin Ağa b. el-Hâc Süleyman Ağa nâm kimesne meclis-i şer‘-i hatîr-i lâzımü’t-tevkīrde bâ‘isü’l-kitâb Mehmed Ağa b. Ali nâm kimesne mahzarında ikrâr-ı tâm ve takrîr-i kelâm edip işbu akd-i âti’z-zikrin sudûruna değin yedimde mülk ve hakkım olup İstanbul’da zikrolunan Sultân Bâyezid-i velî Câmi‘-i şerîfi kurbünde Emîn Bey Mahallesi’nde vâki‘ iki tarafdan Musâhib-i şehriyârî Hızır Ağa tasarrufunda olan menzil ve bir tarafdan Çukadâr Süleyman Ağa menzili ve taraf-ı râbi‘i tarîk-i âm ile mahdûd kârgir mahzeni müştemil bir bâb mülk menzilimi, bi-cümleti’t-tevâbi‘ ve’l-levâhık ve kâffetü’l-hukūk ve’l-merâfık tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ile merkūm Mehmed Ağa’ya bin beş yüz guruşa bey‘ ve temlîk ve teslîm eylediğimde, ol dahi ber-vech-i muharrer iştirâ ve temellük ve tesellüm ve kabz ve kabûl ettikden sonra semeni olan meblağ-ı mezkûr bin beş yüz guruşu merkūm Mehmed Ağa yedinden bi’t-tamam ve’l-kemâl ahz ü kabz edip fîmâ-ba‘d menzil-i mahdûd-ı mezkûrda benim asla ve kat‘â alâka ve medhalim kalmayup merkūm Mehmed Ağa’nın mülk-i müşterâsı ve hakk-ı sırfı olmuşdur, keyfe mâ yeşâ’ ve hasbe-mâ-yahtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 9 Zilka‘de sene [1]194. Şuhûdü’l-hâl: eş-Şâhidûne’s-sâbıkūn.