İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 253 Hüküm no: 234 Orijinal metin no: [70a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dürrîzâde Mustafa Efendi’nin Bebek’teki sahilhane bostanı gediğini kiracıları olan Tited v. Yano ve ortağı Mehmed Ataullah Efendi’ye yüz seksen guruşa sattıkları Mahmiye-i İstanbul’da Ebulfeth Sultân Mehmed Han ‒aleyhi’r-rahmetü ve’l-gufrân‒ hazretlerinin câmi‘-i şerîfleri kurbünde Kirmasti Mahallesi’nde sâkin sâbıkā şeref-efzâ-yı sadr-ı vâlâ-kadr-i Rum olan a‘lemü’l-ulemâ’i’l-mütebahhirîn efdalü’l-fudalâ’i’l-müteverri‘în sadrü’s-sudûr-ı mekârim-pîrâ fahrü’l-e‘âlî-i merâhim-ârâ câmi‘ü’l-mehâmid ve’l-mekârim mefharu’l-ekâbir ve’l-ekârim bâ‘isü’l-kitâbi’l-müstetâb devletlü inâyetlü atûfetlü re’fetlü mekremetlü es-Seyyid Mehmed Ataullah Efendi necli’l-merhûm el-mağfûr ‒ed-dâricü ilâ medârici [rahmeti] Rabbihi’l-Gafûr‒ sâbıkā mesned-ârâ-yı sadr-ı fetvâ ve zînet-efzâ-yı erîke-i takvâ şeyh-i [71a] meşâyihi’l-İslâm Dürrîzâde el-Hâc Mustafa Efendi hazretlerinin Bebek Bağçesi civârında vâki‘ sâhilhâne-i âlîlerinde vâki‘ bostanda beher sene ellişer guruş icâre tesmiyesiyle müste’cirleri ve bostan-ı mezkûr derûnunda olup gedik ta‘bîr olunur âlât-ı lâzıme-i ma‘lûme ve eşcâr-ı müsmireye mutasarrıflar olan Tited v. Yano kendi tarafından asâleten ve karındaşı Yamandi tarafından vekâleten ve Hristo v. Dedo zimmî asâleten meclis-i şer‘-i hatîr-i lâzımü’t-tevkīrde müşârün-ileyh hazretleri taraf-ı bâhirü’ş-şeref-i kerîmânelerinden zikri âtî husûs-ı meymenet-mahsûsu tasdîka vekîl-i şer‘îleri kuzât-ı kirâmdan es-Seyyid Hasan Efendi b. Mustafa mahzarında her biri bi’l-asâle ve bi’l-vekâle ikrâr-ı tâm ve takrîr-i kelâm edip işbu akd-i âti’z-zikrin sudûruna değin yedimizde mülkümüz olup müvekkil-i müşârün-ileyh hazretlerinin sâhilhâne-i mezkûrelerinde vâki‘ bostanında gedik ta‘bîr olunur ma‘lûmü’l-mikdâr bel ve çapa ve tarak ve eşcâr-ı müsmire-i ma‘lûmemizi tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile müvekkil-i müşârün-ileyh hazretlerine yüz seksen guruşa bey‘ ve temlîk ve teslîm eylediğimizde, onlar dahi ber-vech-i muharrer iştirâ ve temellük ve tesellüm ve kabz ve kabûl buyurduklarından sonra semeni olan meblağ-ı mezkûr yüz seksen guruşun elli guruşunu icâre-i mezkûreden zimmetimizde kendülere deynimiz olan elli guruşa takās ve mahsûb, bâkīsi olan yüz otuz guruşu vekîlleri mezbûr es-Seyyid Hasan Efendi yedinden bi’t-tamam ve’l-kemâl ahz ü kabz edip bey‘-i mezkûrun tağrîr ve gabnine ve istifâ-i semene ve gedik husûsuna ve bi’l-cümle husûs-ı mezkûra müte‘allika âmme-i de‘âvî ve kâffe-i mutâlebâtdan müvekkil-i müşârün-ileyh hazretlerinin zimmetlerini ibrâ-i âm ile ibrâ ve ıskāt eylediğimizde, onlar dahi ber-vech-i muharrer ibrâ-i mezkûru ba‘de’l-kabûl fîmâ-ba‘d âlât-ı muharrere-i mezkûre ile eşcâr-ı merkūmede asâleten ve vekâleten bizim asla ve kat‘â alâka ve medhallerimiz kalmayup müvekkil-i müşârün-ileyh hazretlerinin mülk-i müşterâları ve hakk-ı sırfları olmuşdur, keyfe mâ yeşâ’ ve hasbe-mâ-yahtâr tasarruf buyursunlar dediklerini vekîl-i merkūm es-Seyyid Hasan Efendi tasdîk etmeğin mâ-vaka‘a bi’t-taleb ketb olundu. Fî 11 Zilka‘de sene [1]194. Şuhûdü’l-hâl: Müderrisîn-i kirâmdan Müftizâde es-Seyyid Mustafa Efendi, Eşrâf-ı kuzâtdan Yanyavî Mustafa Efendi, Şeyh-zâde Mehmed Emin Efendi, es-Seyyid Mehmed Sâdık Efendi, Müderrisînden es-Seyyid Ali Efendi.