İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 254 Hüküm no: 235 Orijinal metin no: [71a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zeliha bt. İbrahim’in boşandığı kocası İbrahim Ağa b. Hüseyin’den mehir, nafaka ve süknâdan alacağı doksan iki buçuk guruşa takas olarak Hayâtî isimli câriyenin nısfını satın aldığı ve birbirlerinin zimmetlerini ibra ettikleri Husûs-ı âti’l-beyânın mahâllinde ketb ü tahrîri içün bi’l-iltimâs savb-ı şer‘-i enverden irsâl olunan Merhabâzâde Mahmud Efendi mahmiye-i İstanbul’da Tevkī‘î Cafer Mahallesi’nde vâki‘ Çukadâr el-Hâc İbrahim Ağa’nın menziline varup zeyl-i sahîfede muharrerü’l-esâmî Müslimîn huzûrlarında akd-i meclis- şer‘-i Nebevî eyledikde, menzil-i mezbûrda sâkine ve zâtı Mustafa Ağa b. Yusuf ve Mehmed Ağa b. Mehmed ta‘rîfleriyle mu‘arrefe olan Zeliha bt. İbrahim nâm hatun meclis-i ma‘kūd-ı mezkûrda zevc-i dâhili bâ‘isü’l-kitâb merkūm el-Hâc İbrahim Ağa b. Hüseyin nâm kimesne mahzarında ikrâr-ı tâm ve takrîr-i kelâm edip merkūm el-Hâc İbrahim Ağa zevc-i dâhilim olup târih-i kitâb günü beni bâyinen tatlîk etmekle, zimmetinde mütekarrir ve ma‘kūdün-aleyh olan yetmiş guruş mehr-i müeccelim ve nafaka-i iddet-i mu‘ayyene-i ma‘lûmem ve me’ûnet-i süknâm içün dahi bi’t-terâzî beynimizde ta‘yîn olunan yirmi iki buçuk guruş ki cem‘an doksan iki buçuk guruş hakkım olup ve işbu iki yüz seksen beş guruş kıymetli bir re’s zenciye Hayâtî nâm câriyenin nısfı benim ve nısf-ı âharı dahi zevcim mezbûrun yedimizde iştirâken mülkümüz olmağla, zevcim merkūm nısf-ı câriye-i mezkûreyi tarafeyenden îcâb ve kabûlü hâvî bey‘-i bâtt-ı sahîh-i şer‘î ile doksan iki buçuk guruşa bana bey‘ ve teslîm ve ben-dahi ba‘de’l-iştirâ ve’t-tesellüm ve’l-kabûl semeni olan meblağ-ı merkūm doksan iki buçuk guruşu hakkım olan meblağ-ı mezbûr doksan iki buçuk guruşa takās ve mahsûb eylediğimde, ol dahi mukāssa ve kabûl edip ol vechile câriye-i mezbûre benim mülk-i müşterâm oldukdan sonra hukūk-ı zevciyete ve ibtidâ’-i zevciyetden işbu târih-i kitâba gelince beynimizde cereyân eden cemî‘ ahz ü i‘tâ ve mu‘âmelât-ı şettâya ve hukūk-ı ma‘lûme ve mechûleye müte‘allika âmme-i de‘âvî ve mutâlebât ve kâffe-i eymân ve muhâsemâtdan her birimiz âharın zimmetini [71b] ibrâ-i âmm-ı sahîh-i şer‘î ile ibrâ ve ıskāt ve her birimiz âharın ibrâsını kabûl eyledik dedikde mukırre-i mezbûre Zeliha Hatun’u merkūm el-Hâc İbrahim Ağa cemî‘ kelimât-ı meşrûhasında vicâhen tasdîk ve şifâhen tahkīk ve ibrâsını kabûl eylediğini mevlânâ-yı mezbûr mahâllinde ketb ü tahrîr ve ma‘an ba‘s olunan ümenâ-i şer‘le meclis-i şer‘a gelüp alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fî 13 Zilka‘de sene [1]194. Şuhûdü’l-hâl: Mehmed Ağa b. Mehmed, Mustafa b. Yusuf, Hâfız Mehmed Emin b. Süleyman, es-Seyyid Mehmed Çavuş b. es-Seyyid İbrahim, Başçukadâr Abdullah Ağa, Mustafa b. Ali, Ebûbekir Ağa b. Ali.