İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 255 Hüküm no: 236 Orijinal metin no: [71b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zeynelabidin b. Zeynelabidin ile Şerîf Abdullah Efendi b. Mehmed’in borç alış-verişi ve menzil satışı muâmelelerinde birbirlerinin zimmetini ibra ettikleri Mahmiye-i İstanbul’da Aydınoğlu tekyesi kurbünde Karaki Mahallesi’nde sâkin zu‘amâdan es-Seyyid Zeynelabidin b. es-Seyyid Zeynelabidin meclis-i şer‘-i şerîf-i enverde işbu sahibü’l-kitâb eşrâf-ı kuzât-ı kirâmdan hâlâ ser-levha-i yesâr Şerîf el-Hâc Abdullah Efendi b. es-Seyyid Mehmed mahzarında ikrâr-ı tâm ve takrîr-i kelâm edip ben bundan akdem mûmâ-ileyh Şerîf el-Hâc Abdullah Efendi yedinden istidâne ve kabz eylediğim dört yüz guruş mukābelesinde işbu yedinde olan bir kıt‘a hüccet-i şer‘iyye nâtıka olduğu üzere medîne-i Üsküdar’da Kefçe Mahallesi’nde vâki‘ bir bâb mülk menzilimi fâriğan ani’ş-şevâgil efendi-i merkūma alâ-tarîkı’l-istiğlâl bey‘ ve teslîm, ol dahi ba‘de’l-ahz menzil-i mezkûr içün beynimizde mukāvele olunan icâreden dahi zimmetimde müctemi‘a olan yedi yüz yirmi guruş ki cem‘an bin yüz yirmi guruş deynim mukābelesinde merkūm Şerîf el-Hâc Abdullah Efendi’ye bey‘-i bâtt-ı sahîh-i şer‘î ile bey‘ ve temlîk ve teslîm ve yine efendi-i mûmâ-ileyhden bir def‘a dahi istidâne ve kabz ettiğim iki yüz guruş mukābelesinde medîne-i mezbûrede Doğancılar Meydânı kurbünde Süleyman Paşa Mahallesi’nde kâin Kapu Ağası Halil Ağa Vakfı’ndan mutasarrıf olduğum bir bâb vakıf menzilimi dahi bâ-re’y-i mütevellî efendi-i merkūma bi-tarîkı’l-vefâ fâriğ olmuşidim. Edâ-i deyn ile fekk-i rehn dâ‘iyesinde olduğumda, ol dahi bâ-re’y-i mütevellî bana ferâğ ve tefvîz ben-dahi tefevvüz ve kabûl ve müddet-i vâfireden berü beynimizde ahz ve i‘tâ vâkı‘a olmuşidi. El-hâletü-hâzihî işbu târih-i kitâba gelince beynimizde cereyân eden cemî‘ ahz ü i‘tâya ve mu‘âmelât-ı şettâ ve hukūk-ı ma‘lûme ve mechûleye müte‘allika âmme-i de‘âvî ve mutâlebât ve kâffe-i eymân ve muhâsamâtdan mûmâ-ileyh Şerîf el-Hâc Abdullah Efendi’nin ve etbâ‘ından el-Hâc İbrahim’in zimmetlerini ibrâ-i âm ile ibrâ ve ıskāt eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 15 Zilka‘de sene [1]194. Şuhûdü’l-hâl: Merhabâzâde Mahmud Efendi b. Mehmed Emin Efendi, Eşrâf-ı kuzâtdan Mustafa Efendi, Mehmed Ağa b. Ahmed Kethudâ-yı Muhzırân, Bursevî İbrahim Efendi.