İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 256 Hüküm no: 237 Orijinal metin no: [71b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ömer Çelebi b. Zeynelabidin’in Üsküdar Kefçe Mahallesi’ndeki menzilini istiğlal yoluyla Hasan Ağa b. Osman’a iki yüz guruşa sattığı ve bir yıl için aylık iki guruşa kiraladığı Medîne-i Üsküdar’da Kefçe Mahallesi’nde sâkin es-Seyyid Ömer Çelebi b. Zeynelabidin nâm kimesne meclis-i şer‘-i hatîr-i lâzımü’t-tevkīrde bâ‘isü’l-kitâb Hasan Ağa b. Osman mahzarında ikrâr-ı tâm ve takrîr-i kelâm edip akd-i âti’z-zikrin sudûruna değin yedimde mülküm olup mahalle-i mezbûrede vâki‘ bir tarafdan Zeynelabidin Ağa mülkü ve bir tarafdan Ahmed mülkü ve bir tarafdan Hüseyin mülkü ve bir tarafdan tarîk-i âm ile mahdûd büyût-ı adîde ve müştemilât-ı sâireyi hâvî bir bâb mülk menzilimi, cemî‘ tevâbi‘ ve levâhıkı ile bi-tarîkı’l-istiğlâl merkūm Hasan Ağa’ya iki yüz guruşa fâriğan ani’ş-şevâgil bey‘ ve teslîm eylediğimde, ol dahi ber-vech-i muharrer iştirâ ve tesellüm ve kabz ve meblağ-ı merkūm iki yüz guruşu yedinden bi’t-tamam ahz eylediğimden sonra merkūm Hasan Ağa menzil-i mahdûd-ı mezkûru gıbbe’t-tahliyeti’ş-şer‘iyye ve’t-takābuzi’l-mer‘î târih-i kitâbdan bir sene tamamına değin beher mâh ikişer guruşa bana îcâr ve teslîm ben dahi istîcâr ve kabûl eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 15 Zilka‘de sene [1]194. Şuhûdü’l-hâl: eş-Şâhidûne’s-sâbıkūn.