İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 257 Hüküm no: 238 Orijinal metin no: [72a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerîf Abdullah Efendi b. Mehmed’in Üsküdar Kefçe Mahallesi’ndeki menzilini Tahtırevâcı Ömer Çelebi b. Zeynelabidin’e beş yüz elli guruşa sattığı Mahmiye-i İstanbul’da Akseki Mahallesi’nde sâkin eşrâf-ı kuzât-ı kirâmdan hâlâ ser-levha-i yesâr Şerîf el-Hâc Abdullah Efendi b. es-Seyyid Mehmed meclis-i şer‘-i hatîr-i lâzımü’t-tevkīrde işbu bâ‘isü’l-kitâb Tahtırevâcı es-Seyyid Ömer Çelebi b. es-Seyyid Zeynelabidin muvâcehesinde ikrâr-ı tâm ve takrîr-i kelâm edip akd-i âti’z-zikrin sudûruna değin bâ-hüccet-i şer‘iyye yedimde mülk ve hakkım olup olup Medîne-i Üsküdar’da Kefçe Mahallesi’nde vâki‘ bir tarafdan Zeynelabidin Ağa mülkü ve bir tarafdan Ahmed mülkü ve bir tarafdan Hüseyin mülkü ve bir tarafdan tarîk-i âm ile mahdûd fevkānî üç bâb oda ve iki sofa ve dîvânhâne ve tahtânî iki bâb oda ve matbah ve iki kenîf ve bi’r-i mâ’ ve bağçeyi müştemil bir bâb mülk menzilimi, tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ile merkūm es-Seyyid Ömer Çelebi’ye beş yüz elli guruşa bey‘ ve temlîk ve teslîm eylediğimde, ol dahi ber-vech-i muharrer iştirâ ve temellük ve tesellüm ve kabz ve kabûl edip semeni olan meblağ-ı mezkûr beş yüz elli guruşu müşteri-i merkūm es-Seyyid Ömer Çelebi yedinden bi’t-tamam ve’l-kemâl ahz ü kabz eyledim. Fîmâ-ba‘d menzil-i mahdûd-ı mezkûrda benim asla ve kat‘â alâka ve medhalim kalmayup merkūm es-Seyyid Ömer Çelebi’nin mülk-i müşterâsı ve hakkı sırfı olmuşdur, keyfe mâ yeşâ’ ve yahtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 15 Zilka‘de sene [1]194. Şuhûdü’l-hâl: eş-Şâhidûne’s-sâbıkūn.